Atualità
Mussner incunta le Comitê dl Motor Sport: segurëza y Safety Park
Strotöres por alenamënć, segurëza y les competënzes istituzionales y le desturb acustich tl Safety Park: Chëstes les tematiches prinzipales dl’incuntada danter l’assessur por la mobilité Florian Mussner y le Comitê dl Motor Sport dl Südtirol.
Le Comitê dl Motor Sport dl Südtirol é na rapresentanza dles organisaziuns prinzipales di sporć sön motor tl Südtirol. Dan da püch s’a incunté por le pröm iade l’assessur por la mobilité Florian Mussner cun i rapresentanć dles organisaziuns por tratè les chestiuns prinzipales dl setur, öna de chëstes é la segurëza.
“I sporć sön motor – a splighé le portausc Werner Clementi – ne é nia ma na ressursa economica por la sozieté, mo é inće n’ativité importanta por i jogn tratan le tëmp lëde. Insciö él important che le sport pois gnì pratiché te strotöres adatades, inće por na chestiun de segurëza, sciöche tl Safety Park”.
Por ći che reverda le Safety Park à l’assessur Mussner sotligné che “al é nezesciar, inće por garantì le funzionamënt dl Safety Park sciöche zënter de formaziun y educaziun stradala, da smendrì le desturb acustich, laoran fora por ejëmpl n codesc de comportamënt tratan les manifestaziuns. Al sarà important –insciö inant Mussner - da ciafè la dërta balanza danter i bojëgns desfarënć meton tres al pröm post l’aspet formatif y educatif dla strotöra”.
rc
