Atualità
Antizipaziuns por i ressanamënć dles ćiases: bele domandes por 2,5 miliuns
La gran domanda do les antizipaziuns, conzedüdes dala Provinzia sciöche n imprëst sön la restituziun dles cutes preodü dal Stat por le ressanamënt de ćiases d’abitaziun privates, devënta tres plü alta.
Ćina śëgn él gnü dè jö domandes pro indöt 2,5 miliuns de euro. Incö, mertesc ai 22 de messè, ti à la Junta provinziala inće dè formalmënter l’inćiaria d’aministraziun dl fonds de rotaziun ala sozieté Finance AG.
Le fonds de rotaziun por le ressanamënt de ćiases d’abitaziun tl setur privat é dotè por le momënt cun indöt dodesc miliuns de euro y vëgn aministré dala Südtirol Finance, sozieté provinziala por finanziamënć. „Incö unse aprovè la convenziun cun la sozieté y implü unse inće tut la dezijiun, che sce al dess ester debojëgn, spo po l'import dles antizipaziuns dl fond gnì aumentè“, insciö le Presidënt dla Provinzia, Arno Kompatscher, tratan la conferënza stampa do la sentada dla junta provinziala.
Le gran numer de domandes do antizipaziuns gnü ite ćina śëgn desmostra le gran interès da pert di proprietars de abitaziuns privates. Bele ti pröms cinch dis do la daurida dla prozedöra él gnü dè jö domandes por na soma de indöt un n miliun de euro. „Ćina incö él gnü dè jö indöt 70 domandes, por na soma totala de imprësć che fej fora indöt 2,5 miliuns de euro“, à dit incö Arno Kompatscher.
rc
