Atualità
Dala Junta: Urbanistica, FSE y Euregio
Do n’edema de palsa à la Junta provinziala albü incö (22 de messé) n gröm de punć sön l’ordinn dl dé. Insciö él gnü tratè danter l’ater na seria de mudaziuns al plann urbanistich, la presentaziun dl proiet Euregio-Lab al Forum Alpach ai 17 de agost y la redestribuziun di contribuć dal fonds sozial europeich.
FSE: Definiziun nöia dles istanzes de control
Deache l’Uniun Europeica ti à segnalè ala Provinzia de Balsan n valgügn problems pro la conzesciun de contribuć dal Fond Sozial Europeich (FSE) tl Südtirol, à la Junta provinziala aprovè incö (22 de messè) la redefiniziun dles istanzes de control. „Insciö unse incö stabilì danü les istanzes y les prozedöres de control en acordanza cun les diretives dl’Uniun Europeica“, à dit le Presidënt dla Provinzia, Arno Kompatscher tratan la conferënza stampa do la sentada dla junta. „La mudaziun plü grana é la spartiziun dl control da öna na pert y de dötes les atres mosöres aministratives dal’atra, por podëi insciö garantì l’imparzialité dles prozedöres de control“, spliga Kompatscher.
„Insciö él baldi inće preodü che na pert di contribuć bele aprovà ne podarà nia gnì paià fora y che n valgügn messarà gnì damanà zoruch“, insciö Kompatscher che à ajuntè, che la gauja é chëra, che les domandes dades jö ne ti corespogn nia daldöt ales condiziuns metüdes dant da Bruxelles.
L’Euregio Lab presentarà sü resultać al Forum Alpach
Inće chësc ann gnaràl dediché un n dé dla manifestaziun europeica Forum Alpach al proiet dl'Euregio y chësc ai 17 de agost. Döes scomenciadies dla colaboraziun suraregionala danter le Tirol, le Südtirol y le Trentin gnarà insciö presentades tratan le dé dl Euregio: da öna na pert gnaràl assegné le pest Euregio por scienzià jogn y dal’atra pert gnaràl inće presentè i resultać dl'Euregio Lab, n laboratore formè da n grup de indöt 20 esperć dl setur. „Le laboratore presentarà dandaldöt de plü resultać lià ales tematiches sön l’evoluziun y le dagnì dl'Euregio ti seturs dla sciënza, dl’inrescida, dla cultura, dl’economia, dla politica y dla sozieté“, à dit le Presidënt dla Provinzia incö.
Plann urbanistich: Manco conflić por merit de na prozedöra nöia
La Junta provinziala à implü aprovè incö na gran seria de mudaziuns al plann urbanistich te de plü comuns. „Por merit dla prozedöra nöia é les dezijiuns plü suarides da tó“, à splighé incö le Presidënt Arno Kompatscher do la sentada dla junta. La prozedöra nöia prevëiga insciö che les mudaziuns al plann urbanistich passa do na pröma dezijiun da pert dl Comun diretamënter a na comisciun provinziala, che dà spo jö na valutaziun asvelta dles mudaziuns. „Daldô vëgn spo la proposta de mudaziuns tratada por n secundo iade dal consëi de comun, adöm cun les vaultaziuns dla comisciun y eventualmënter dla popolaziun“, à splighé Kompatscher incö y à inće ajuntè, che les mudaziuns al plann urbanistich vëgn aprovades insciö te na manira plü asvelta y manco debatüda.
rc
