Atualità
Itinera: N liber nü descrî la storia dles strades militares tl Südtirol
Tl Südtirol él gnü fat indöt 240 chilometri de strades por rajuns militares. La storia dles strades y sües particolaritês é al zënter de na publicaziun nöia dal titul „Itinera“. Le liber nü é gnü presentè incö (ai 24 de messè) a Balsan dal assessur por le patrimone Florian Mussner.
Cun le passaje de na gran pert di imobiliars militars dal Stat ala Provinzia – tl 1998 i puncri y plü inant les cinch strades militares prinzipales – à la Repartiziun Patrimone ciafè la poscibilité da studié plü daimprò les strades militares storiches y da implì insciö na loćia nia ćiamò studiada a funz dla storia dl Südtirol. „Cun chësta publicaziun nöia oress l’Ofize sciazada dla Provinzia contribuì a na conescënza plü ampla dla storia dl Südtirol, dandaldöt por ći che reverda la presënza de fortificaziuns y de azesc militars sön les zones de confin“, à dit incö l’assessur Florian Mussner tratan la presentaziun dl liber „Itinera“ tl Palaz provinzial 2 a Balsan.
„Al é fondamental da documentè le passaje de chisc relić storics ala provinzia, mo le splighé é n impëgn cultural“, à ajuntè Florian Mussner che s’à referì insciö inće al Zënter de Documentaziun sot le Monumënt dla Vittoria: „La spligaziun storica de chësc capitul contribuësc a amplié la conescënza storica tla popolaziun y porta insciö al svilup dl Südtirol sciöche na plaza de pêsc“, insciö Mussner. Le titul dla publicaziun nöia vëgn dala parora latina „iter-itineris“ che à de plü significać sciöche strada, direziun, iade, transit o marsc militar: na richëza de significać che spliga inće en pert la storia de chëstes strades.
Aldedaincö vëgn les strades militares, indöt zirca 100 strades por na lunghëza de 240 chilometri, anuzades tla vita da vigni dé y à insciö ciafè n valur zivil alt: sciöche strades da munt, trusc de coliamënt cun les munts, trusc da jì cun la roda o por fà spazirades. „Püć de nos sa – à splighé le diretur dla Repartiziun Patrimone Josef Urthaler – che na pert dles strades di jus tl Südtirol é gnüda realisada por fins militars de defenüda. Impormò te n secundo momënt éres spo gnüdes anuzades sciöche strades de coliamënt dala popolaziun zivila.“
Le liber „Itinera“ é partì sö te de plü capitui. Tla pröma pert vegnël splighé la storia di trasporć tl Tirol y tles vijinanzes, la secunda pert é dedicada ales 5 strades de comunicaziun plü importantes por la defenüda di confins tratan la perioda de vera. Le liber é gnü publiché te dui lingać (talian y todësch), l’editur é Curcu&Genovese y le prisc é de 28 euro.
Fotos por la stampa po gnì desciariades tres facebook sot a chësc link:https://www.facebook.com/media/set/?set=a.819409161402818.1073741837.175038282506579&type=3&uploaded=8
rc
