Atualità
Informaziuns sön l’auto, les corieres y la ferata da öna na Zentrala
Plü segurëza tratan i iadi, informaziuns ajornades vigni dé, anuzamënt plü saurì di sorvisc pità: chisc é i obietifs primars dl’unificaziun dla Zentrala Viabilité cun le sorvisc dl Info-Mobilité. L’assessur provinzial Arnold Schuler à presentè incö (25 de messè) l’incorporaziun di dui sorvisc te öna na Zentrala che arà la sënta tla Repartiziun Proteziun cuntra le medefüch y Proteziun zivila.
I dui sorvisc vëgn da śëgn inant unificà y les modalitês de chësta unificaziun é gnüdes presentades incö tla sënta dla Proteziun Zivila a Balsan. Tla Zentrala Viabilité röia adöm dötes les informaziuns sön i evënć tla viabilité tl Südtirol sciöche inće tles Regiuns confinantes. Chëstes informaziuns vëgn spo metüdes a desposiziun di utënć tres n sistem informatif sön de plü canai: sön le radio, sön la plata internet, por telefonn y por email. Le sorvisc dl Info-Mobilité s’ocupëia prinzipalmënter da dè inant informaziuns por ći che reverda i coliamënć di mesi dl trasport publich, informaziuns sön i orars, i prisc, la chirida de coliamënć y le Südtirol Pass.
I numers dl telefon atifs ćina śëgn resta confermà: le 0471 200198 por la Zentrala Viabilité y le 840000471 por le sorvisc dl Info-Mobilité. Por ći che reverda le Südtirol Pass y i abonamënć gnarà les domandes di zitadins menades inant dala Zentrala ai sorvisc de competënza, inće tratan la fin dl’edema. Chësc é gnü confermè da Hanspeter Staffler, diretur dla Repartiziun Proteziun cuntra le medefüch y Proteziun zivila.: „Chisc sorvisc gnarà pità inće tl dagnì dal’Info-Mobilité che é gnüda integrada tla Zentrala Viabilité.“
L’assessur Arnold Schuler à portè dant i obietifs prinzipai dl’operaziun: „Na maiù segurëza sön strada y sön les scines, informaziuns ajornades vigni dé y n’anuzamënt maiù di sorvisc pità.“ I vantaji dl’unificaziun é inće gnüs presentà dal diretur dl’Assessorat por la Mobilité Valentino Pagani, che à dit: „Informaziuns ajornades y fidables é aldedaincö assolutamënter nezesciares por düć chi che é sön le iade, sides cun l’auto co cun i mesi dl trasport publich, dandaldöt ti caji d’interuziuns o d’intardiades nia preodüdes.“
L’unificaziun di sorvisc porta inće a n ampliamënt di orars d’ofize: da n lönesc, ai 28 de messè, é le sorvisc atif düć i dis dl ann dales 6 ales 20 (les domënies y i dis de festa dales 7.30 ales 20). Cun l’unificaziun n’él nia ma gnü arlunjé l’azessibilité por i zitadins, mo al é inće stè poscibl da sparagné zirca 290 mile euro al ann de cosć.
rc
Galaria dales fotografies
