Atualità
L’assessur Theiner ti fej vijita al Parch Natural „Fanes-Senes-Braies“
Le Parch Natural de Fanes-Senes-Braies vëgn vijité dandaldöt ti mëisc da d’istè: de chësta tematica y de co miorè i azesc al Parch à baié da püch l'assessur Richard Theiner cun i responsabli dl Parch Natural tratan na vijita a Al Plan de Mareo.
Plü o manco 15.000 porsones vijitëia te n ann la Ćiasa dl Parch Natural a Al Plan de Mareo. La maiù pert dles porsones anüza i azesc da Pederü, dal Lêch de Braies y dala Capana Alpina por vijité le Parch Natural. „Deache dandaldöt d’isté é l’afluënza grana orunse porvè, adöm cun l’Ofize parcs naturai, da miorè chisc azesc“, à dit l’assessur por parcs naturai Richard Theiner. A Pederü à l’Ofize parcs naturai, cun l’aiüt dl’Ispetorat forestal da Bornech y dl Comun da Mareo, bele ressanè la plaza da parchè, śëgn él ćiamò da miorè i azesc al Parch.
L’assessur Theiner à inće dè jö so arat positif sön l’ampliamënt dla Ćiasa dl Parch Natural cun le fin de realisé na mostra sön les Dolomites sciöche patrimone mondial dl’Unesco. „Inće conscideran che tl Comun de Mareo ciafunse la plü gran pert dl raiun sot a proteziun dl Unesco é n ampliamënt dessigü na mosöra plajora“, à dit Theiner.
Le Parch natural Fanes-Senes-Braies é gnü metü sö dl 1980 y tol ite n’area de incër 25.680 hectar. Le raiun de sconanza se sleria fora ti comuns de Badia, Braies, Toblach, La Val, Mareo y Valdaora. Les tëmples ôtes devers de Puster fej da confin setentrional dl parch, a vest confinëia les tëmples da bosch cuntra la Val Badia, a süd röiel ćina sön le termo provinzial, le confin oriental é dè dant dales Dolomites de Le Sest cun la Val de Lander.
USP
