Atualità
Le Stat damana na compensaziun sön l’IMU, la Provinzia fej recurs
Le Stat damana na compensaziun dles mëndres entrades tl cheder dla cuta sön i imobiliars (IMU), la Provinzia constatëia na violaziun dla spartiziun dles competënzes. La Junta provinziala à insciö tut incö (ai 5 de agost) la dezijiun da contestè le decret dl Minister por l’Intern dan da la Curt costituzionala.
Ala fin de jügn à le Minister por l’Intern comanè n decret che prevëiga la compensaziun dles mëndres entrades dala tassa dl IMU sciöche conseguënza de esenziuns y detraziuns preodüdes por i Comuns. Ti paiamënć dles compensaziuns vëgnel inće tut ite les Provinzies de Balsan y dl Trentin, scebëgn che les döes provinzies à competënzes autonomes por ći che reverda les desposiziuns finanziares sön les cutes locales. Te chësc caje ne él implü gnanca gnü conscidrè che i mudamënć de desposiziuns finanziares po ma gnì fać en acordanza danter Stat y Provinzia.
La Junta provinziala à insciö tut incö (05/08) la dezijiun da jì inant sön le tru legal cuntra le decret dl Minister por l’Intern: le decret gnarà contestè dan da le tribunal aministratif sciöche inće dan dala Curt costituzionala. „N recurs logich che é en ligna cun dötes nostes contestaziuns inće tl passè canche al é gnü porvè da intervenì tles competënzes dla Provinzia“,à dit le Presidënt dla Junta incö.
rc
