Atualità
Bonus energia: plü efiziënza energetica, plü cubatöra
„Chi che investësc tl mioramënt energetich di frabicać, sura i standarg dà dant fora, vëgn recompensà“: chësc é le messaje dl assessur por l’energia Richard Theiner por ći che reverda la regolamentaziun nöia dl bonus energia che é gnüda arprovada dala Junta inier tratan süa sentada edemala. L’assessur Theiner à splighé incö (6 de agost) a Balsan plü avisa i mudamënć preodüs dal regolamënt nü.
Le diretivês nöies aprovades dala Junta provinziala à arlungé les condiziuns por l’aplicaziun dl „bonus energia“, che vëgn conzedü tl caje de n mioramënt energetich dles ćiases, dandaldöt tles zones residenziales. „Le prinzip de fondamënta dla regolamentaziun nöia é na maiù sovenziun dl’aumënt de efiziënza energetica dles ćiases che dess inće portè a sparagné sön l’anuzamënt suplementar de terać“, à sotligné incö l’assessur por l’energia Richard Theiner tratan la presentaziun dla regolamentaziun nöia. „Nosta intenziun é chëra da premié chi che investësc tles mioraziuns energetiches“, insciö Theiner.
Le sostëgn economich dl bonus energia é preodü sides por ćiases bele fates sö che por les nöies y à sciöche obietif l’inalzamënt di standarg dl’efiziënza energetica di frabicać esistënć y – por ći che reverda les ćiases nöies – dl superamënt di livì energetics minimai dà dant dala lege. La deliberaziun dla Junta jarà en forza do la publicaziun tl boletin ofizial dla Regiun.
Le regolamënt nü prevëiga danter l’ater, ćina la fin dl 2016, la conzesciun dl bonus energia dl 10 porcënt sön düć i frabicać (esistënć y nüs) che superëia le standard „Ćiasa Clima B nature“, y dl 15 porcënt por la tlassa „Ćiasa ClimaA“, y dl 20 porcënt por düć i frabicać cun le standard „Ćiasa Clima A nature“ (ćina śëgn êl dl 15 porcënt). Cun la zertificaziun „Ćiasa Clima nature“ ne vëgnel insciö nia ma valuté le anuzamënt d’energia dl frabicat y l’efiziënza energetica generala, mo inće la sostenibilité dl frabicat. I critêrs che vëgn tuć en conscideraziun é insciö: la sostenibilité ambientala di materiai adorà pro la costruziun dl frabicat, le implant idrich, l’iluminaziun naturala, le assorbimënt acustich y les mosöres de proteziun cuntra le gas radon. Por dötes les costruziuns nöies él bele preodü la tlassa „Ćiasa Clima B“ y por chëstes ne él insciö preodü degun bonus energia.
Implü él ćiamò gnü portè dant n’atra novité: le bonus cubatöra ne vëgn da śëgn inant nia ma plü conzedü ti caji de n mioramënt dl’efiziënza energetica dla tlassa „Ćiasa Clima C“, mo inće ti caji olache al vëgn arjunt n mioramënt dl’efiziënza energetica dl frabicat cun la zertificaziun „Ćiasa Clima R“ (preodüda por ressanamënć). Le bonus energia ne vëgn nia apliché tles zones industriales, ater co sce al se trata de abitaziuns esistëntes che ne é nia abitaziuns de sorvisc y che ademplësc dötes les condiziuns por ciafè le bonus energia (cubatöra minimala de 300 mc y edificaziun dal l. 2005).
Les desposiziuns aprovades dala Junta provinziala vel ćina ai 31 de dezëmber dl 2019, daldô ne saràl nia plü poscibl da s’anuzé dl bonus energia. La tomada de chësc terminn é preodüda dales diretivês dl’Uniun Europeica.
rc
