Atualità

Frabiché | 10.09.2014 | 12:16

San Martin de Tor: La strada provinziala vëgn slariada y dortorada

I laûrs de dortorada dla strada provinziala che porta dal zënter dl paîsc de San Martin de Tor al Museum Ladin Ćiastel de Tor gnarà surandà en mercui dla proscima edema ai 17 de setëmber. Le cost dl intervënt é de 462mile euro.

I intervënć de dortorada reverda n tòch de strada lunch 500 metri dla trassa dla strada provinziala tl Comun de San Martin de Tor che porta dal zënter dl paîsc de San Martin de Tor al Museum Ladin Ćiastel de Tor danter i chilometri 42,95 y 43,44. Al gnarà deslarié n valgönes perts trëntes; la strada da śëgn gnarà slariada ćina 5 metri, 2,5 por striara. I intervënć, spliga le geom. Marco Pinzan dl Ofize tecnich strades nord y responsabl di laûrs, va debojëgn porvia dl trafich ti mëisc da d’isté. La strada coliëia la Val Badia cun Börz y la Val d’Isarch tres Funes, Eores y Lijun. Paralelamënter al slariamënt dla strada él preodü sön la pröma pert la realisaziun de n marciapîsc por alisiré l’azès ai vijitadus che va a pé a ti ćiarè al Museum Ladin Ćiastel de Tor.

I laûrs ti gnarà surandà al'impresa "Ploner s.r.l" le proscimo mercui, ai 17 de setëmber. Al é preodü che i laûrs gnarà slüć jö te 150 dis por püch deplü co 462mile euro.

 

 

rc

Galaria dales fotografies