Atualità
Dala Junta: Discusciun sön le bilanz 2015, le budget é costant
Incö danmisdé (11 de setëmber) s’à incuntè la Junta por mët man la discusciun sön le bilanz de previjiun por le 2015. La pröma analisa dles zifres prevëiga n trend tl vers dla stabilité: la soma complessiva dles entrades dla provinzia por le 2015 é preodüda de ester de 5,2 miliarg de euro, che gnarà smendrida a 4,5 miliarg por gauja dles resserves che messarà gnì metüdes da pert.
Tla pröma pert dla sentada de tlausura à la Junta provinziala tratè la spëisa de bilanz dles dezijiuns tutes tl’ultima perioda. Daldô él spo gnü debatü sön l’argomënt prinzipal, le bilanz de previjiun por le 2015, na pröma proposta é gnüda laurada fora dai assessurs y dal presidënt Kompatscher.
„N’analisa dles prömes zifres nes mostra che la soma dles entrades restarà presciapüch invariada en confrunt al 2014“, à comentè Kompatscher che prevëiga che l'arbassamënt dles cutes stabilì dala provinzia gnarà recuperè dala previjun de na chersciüda economica por le 2015. La soma totala dles entrades preodüda por le 2015 é insciö de 5,2 miliarg de euro, de chisc saràl meso da dè fora por le momënt 4,5 miliarg, deache, „ zirca 700.000 miliuns de euro mëss gnì metüs da pert por gauja dles desposiziuns dl govern Monti pro ći che reverda le ressanamënt dl indebitamënt dl Stat“, à dit Kompatscher che à recordè che „la Provinzia à fat recurs cuntra chësta dezijiun dan dala Curt costituzionala y che la probabilité che an ciafes rajun é buna.“
Ti ultimi dis él inće gnü inrescì tles singules Repartiziuns provinziales sön la soma totala dles spëises preodüdes por le 2015, „che al momënt superëia la capazité economica dla provinzia de 300 miliuns y che röia indöt a 4,8 miliardg de euro“, insciö Kompatscher che à dit che: „valgönes spëises gnarà ejaminades por gnì smendrides o partides sö sön de plü agn.“
La Junta provinziala oress aprovè le bilanz de previjiun 2015 por la fin de novëmber/ mët man de dezëmber por ti dè insciö la poscibilité ai Comuns de laurè fora y dè jö so bilanz por le terminn fissé dala lege. La Junta à inće anuzé l’incuntada da incö por presentè les tematiches plü importantes de vigni assessorat por i proscimi trëi mëisc. „A chësta manira sunse düć informà sön le chestiuns atuales y sön i vari importanć che gnarà tuć tles proscimes edemes“, insciö Kompatscher incö do la sentada de tlausöra dla Junta.
rc
