Atualità
Hanspeter Staffler é le Diretur general nü dla Provinzia
Hanspeter Staffler, ćina incö diretur dla Proteziun zivila, é le diretur general nü dla Provinzia de Balsan. Staffler é gnü presentè incö danmisdé (11 de setëmber) dala Junta provinziala. „Le candidat Staffler é gnü chirì fora do n prozès de seleziun lunch y detaiè, i sun sigüsc de avëi ciafè la porsona dërta por chësta inćiaria“, à dit le Presidënt Kompatscher.
Un di obietifs prinzipai dl program dla Junta provinziala nöia ê chël da desfarenzié danter les posiziuns dl secretêr general dla Junta provinziala y chël dl diretur dl’aministraziun provinziala. Cun la lege finanziara dl 2014 él gnü cheriè la basa iuridica por scrì fora le concurs ai 27 de jügn, da chël che la Junta provinziala, adöm cun l'Istitut de consulënza Egon Zehnder, à chirì fora le Diretur general nü dla Provinzia. Le concurs é gnü davagné da Hanspeter Staffler che é gnü presentè incö dala Junta provinziala te süa inćiaria nöia.
„Hanspeter Staffler sarà la figöra de livel plü alt tl’aministraziun publica y messarà svilupé inant l’aministraziun publica por la portè plü dlungia ai zitadins, laoran sön la scemplificaziun dles prozedöres y dl conzet de sostenibilité por ći che reverda le personal y les ressures finanziares“, à splighé l’assessuria Deeg che à definì Hanspeter Staffler, por merit de sües esperiënzes ti agn passà, sciöche la porsona plü adatada al inćiaria.
„I surantol chësta inćiaria – à comentè Staffler – cun ligrëza, y sciöche südtirolej él por me n gran onur podëi rapresentè la provinzia te chësta funziun. L’inćiaria che me é gnüda surandada é inće na gran sfidada, che i toli tles mans adöm cun le secretêr general Eros Magnago por adatè l’aministraziun publica ala realté atuala. Al sarà debojëgn da fà modificaziuns a na strotöra che é nasciüda dan da 25 agn y che à conesciü plü periodes cun gran cambiamënć“.
Hanspeter Staffler à 48 agn, s’à diplomé te injinieria, à metü man da laurè sciöche dependënt provinzial tl 1996, naôta pro la Repartiziun Costruziuns idrauliches dla Provinzia, y deventè daldô diretur dl Ofize Sistemaziun de rüs de munt y paralovines süd ćina le 2007. Dal 2007 é Staffler diretur dla Repartiziun Proteziun cuntra le medefüch y Proteziun zivila.
Tratan la prozedöra de seleziun y ejaminaziun di candidać é la Provinzia gnüda sostignida dal Istitut de consulënza Egon Zehnder, cun chël che al é gnü ejaminé dötes les candidatöres a funz.
rc
Galaria dales fotografies
Foto USP/Othmar Seehauser
