Atualità
Le patrimone dla Provinzia é de 8,18 miliarg de euro
8,18 miliardg de euro: chësc é le valur complessif dl patrimone dla Provinzia de Balsan. La Repartiziun Patrimone à en gestiun indöt proprietês por n valur complessif de 4,168 miliarg de euro, laprò röiel 2,668 miliarg de euro de strades y le patrimone dla Laimburg, dl demane forestal y dles ressurses idriches. L’ospedal da Maran à la valüta singula plü alta: 164,5 miliuns de euro.
„Aladô dla suraodüda à la Repartiziun Patrimone en gestiun bëgns de na valüta totala de 4,168 miliarg de euro y che fej fora presciapüch le 50 porcënt dl patriome complessif dla Provinzia“, insciö le diretur dla Repartiziun Patrimone Josef Urthaler che ajuntëia, che i bëgns imobiliars fej fora 4,046 miliarg de euro. Le frabicat cun la valüta singula plü alta é l’ospedal da Maran che vêl cun 164,5 miliuns de euro, dan da l'ospedal de Balsan (148 miliuns de euro) y le frabicat dl Université a Balsan (115 miliuns de euro). Le frabicat dl Université ne é nia partì sö te plü strotöres y é insciö le frabicat singul cun le valur plü alt tla proprieté dla Provinzia.
La soma che romagn de 122 miliuns de euro é metüda adöm da bëgns mobils. Tla lista di bëgns mobils él da ciafè 7424 computers, 1391 veicui (adöm cun corieres y mascinns de laûr), 4711 scovertes archeologiches y 326 ermes d’ordinanza. I bëgns ti museums y dles coleziuns museales fej fora le 41 porcënt dla valüta totala di bëgns mobils tla prioprieté provinziala, te chisc tomel ite 4402 cuadri y operes d’ert sciöche por ejëmpl les operes artistiches de Hans Klocker, Guercino, Albin Egger Lienz, Franz von Defregger, Alexander Köster y Rudolf Stingl che à n valur singular danter 100.000 ćina 500.000 euro.
La Repartiziun Patrimone à inće cumpedè adöm le valur dl patrimone che vëgn aministré da atres istituziuns provinziales. La Repartiziun Sorvisc Strades à en gestiun por ejëmpl le patrimone dles strades, di grunć y di frabicać che alda laprò y che à n valur complessif de 2,668 miliarg de euro. La rëi dles strades provinziales fej fora indöt 2,524 miliarg de euro.
Pro le patrimone total dla Provinzia che é de 8,18 miliarg de euro, vëgnel ćiamò cumpedè laprò i bëgns dl demane forestal (85, 3 miliuns de euro), i bëgns che vëgn aministrà dala Laimburg (138 miliuns de euro) y les ressurses idriches (bëgn 1,122 miliarg de euro).
rc
