Atualità
Assessur Mussner: Valorisé le lingaz dla uma y le tratè cun respet
(OSP) "Cun le lingaz dla uma déssun avëi ligrëza: le lingaz n'é nia ma n strumënt de comunicaziun, mo al é na pert de nos instësc y espresciun de nosta cultura", insciö l'assessur ladin Florian Mussner en ocajiun de chësc Dé internazional protlamè por en vëndres, ai 21 de forà dal'UNESCO.
Al é important da avëi cosciënza de nostes tradiziuns linguistiches y culturales, insciö l’assessur Mussner. “Le lingaz é le strumënt plü important por mantignì nostes raîsc y por svilupé inant nosta cultura”, insciö l’assessur. Le lingaz ladin cun sü deplü idioms é le lingaz plü vedl y le plü pice de nosta provinzia y se damana porchël na sconanza particolara dai ladins instësc y ince dai vijins.„Mëte averda da baié n bel lingaz y ciarè da l’adorè tres deplü ó ince dì tl medem tëmp ester toleranc’ y avëi comprenjiun por les desfarënzies dles tradiziuns de d’atri lingac y de d’atres cultures y costruì n dialogh” dij Mussner. De chësc verse é i ladins dessigü d’ejëmpl, en pert ài messü se daurì ai atri, en pert ài ince chësta capacité.
Le dé internazional dl lingaz dla uma, protlamè dal’organisaziun dles Naziuns Unides por l’educaziun, la sciënza, la cultura y la comunicaziun UNESCO à le fin de stravardè i plü co 6.000 lingac che vëgn ciamò baià sön chësc monn. N ater fin é chël de promöie na educaziun te deplü lingac cun düc’ i mesi ch’é a desposiziun por ti rové pormez ai bojëgns de na sozieté multilinguistica y interculturala.
OSP
