“Le planët sona y ćianta” vëgn presentè a La Ila ai 22/09
En lönesc ai 22 de setëmber dales 16 gnarál presentè tl gran salf dla Scora mesana da La Ila material didatich nü dè fora dal Departimënt dl’Educaziun Ladin cun le sostëgn de Inovaziun y Consulënza realisé por l’insegnamënt dl’educaziun musicala tles scores ladines.
Paolo Vinati y Susy Rottonara presentarà la publicaziun nöia “Le planët sona y cianta” ai 22/09 a La Ila (Imaja: Ofize Inovaziun y Consulënza)"Le planët sona y ćianta" é le titul dla recoiüda de dodesc unitês didatiches por l’educaziun musicala interculturala metödes adöm dal musicologh Paolo Vinati cun la elaboraziun didatica de Susy Rottonara. Ara se trata de materiai che ti pîta ai insegnanć poscibilitês inovatives por strotoré les leziuns de educaziun musicala aladô dl carater intercultural di contignüs, che dess portè i scolars a imparè i elemënć fondamentai dla musiga tres la conescënza dles sortes de musiga desvalies tl monn. I tesć vëgn dant te trëi lingac –ladin dla Val Badia y de Gherdëna, todësch y talian– y é inće adatà por coliamënć interdisciplinars cun d’atres materies d’insegnamënt, insciö che ai po gnì tuć ca por de majeri proieć ia por l’ann de scora inće en colaboraziun cun les Scores de musiga. Le Departimënt dl’Educaziun Ladin inviëia insciö ala presentaziun dla publicaziun nöia che vëgn tignida
en lönesc, ai 22 de setëmber
dales 16.00
tl gran salf dla Scora mesana
a La Ila.
Do les parores de salüt dl Intendënt dla scora ladina Roland Verra gnarà la publicaziun nöia presentada da Susy Rottonara, che s'à cruzié dl'elaboraziun didatica y dal musicologh y autur Paolo Vinati. Do la presentaziun ufiziala podarà i materiai gnì desćiarià dala plata web de Inovaziun y Consulënza pedagogich.it. La versiun stampada di materiai sarà da ciafè por consultaziun tles scores, scolines, scores de musiga y biblioteches ladines. Por plü informaziuns: http://www.pedagogich.it/
rc
Galaria dales fotografies
Paolo Vinati y Susy Rottonara presentarà la publicaziun nöia “Le planët sona y cianta” ai 22/09 a La Ila (Imaja: Ofize Inovaziun y Consulënza)
