Atualità
Aeroport de Balsan: La Junta stabilësc i obietifs
La Junta provinziala à stabilì incö mertesc, ai 16 de setëmber i obietifs dl conzet nü por la gestiun dl Aeroport da Balsan. Al gnarà insciö ejaminé les poscibilitês de mioraziun dl’anuzamënt dl aeroport por la popolaziun y por l’evoluziun dl’economia locala tolon en conscidraziun inće na maiù colaboraziun cun Desproch y la sconanza dl ambiënt.
„La Junta provinziala à tut incö (16 de setëmber) la dezijiun da ti dè l’inćiaria ala ABD, la sozieté che à en gestiun l’aeroport, da laurè fora n conzet nü che dess presentè les capazitês dl aereoport por n svilup sostenibl“, insciö le Presidënt Kompatscher che dij, che „al foss falè da tó śëgn dezijiuns zënza avëi studié la chestiun a funz, inće deache l’aeroport à na funziun strategica por le coliamënt tl nord y tl süd, por l’economia locala sciöche inće por le turism.“„I ne se fajun nia l’ilujiun che l’aeroport podarà funzioné zënza contribuć publics, mo chisc podarà gnì smendris tl dagnì cun n conzet nü“, insciö Kompatcher, che à recordè te chësc contest inće les spëises dla Provinzia por ći che reverda le trasport publich local: „Por i sorvisc de trasport sön le scines vëgnel vigni ann dè fora 50 miliuns de euro, 80 miliuns por le sorvisc che les corieres pita, 5,8 miliuns por l’aeroport y 7,3 por i sorvisc extra dl trasport scolastich.“
Le conzet nü dl aeroport da Balsan prevëiga na maiù colaboraziun cun l’aeroport da Desproch. „Nosta ghiranza é na colaboraziun plü strënta che portass vantaji a trami dui y che renforzass la visibilité y l’azessibilité dl’Euregio“, à dit Kompatsche incö tratan la conferënza stampa do la sentada dla Junta provinziala. Nia ma la stabilité economica é n critêr por le conzet nü che gnarà laurè fora, mo inće la soportanza ambientala messarà gnì garantida. „Tl plann che gnarà studié fora messaràl inće gnì inserì garanzies sön la dimenjiun dl’incuinamënt che arà limitaziuns soportables“, à recordè le Presidënt Kompatscher. Insciö gnaràl inće ejaminé ciamò n iade i proieć d’esapnjiun y d’adatamënt dl aeroport, inće „por capì damì ći che é nezesciar y ći che ne le é nia por na gestiun rentabla dl aeroport“, à sotrissé Kompatscher incö.
Les mosöres che gnarà concordades messarà insciö ester tleres y logiches: „Canche al gnarà presentè n conzet nü metarun a jì na discusciun publica“, insciö Kompatscher che ajuntëia, che l’aeroport ne é nia na chestiun socrëta, mo de interès publich. „Da öna na pert s’àl desmostrè che n anuzamënt rentabl dl aeroport é de interès publich y dal’atra pert s’àn anadè ti ultimi agn che la tematica dl aeroport é dër sintida danter la popolaziun südtiroleja“, à stlüt jö Kompatscher.
rc
