Atualità
Dala Junta: Pest Euregio por la cooperaziun
„Implì de vita l'Euregio“: chësc é le slogan dl proiet transfrontalier nü che vëgn metü a jì tl raiun dl Euregio tles Regiuns dl Südtirol, dl Trentin y dl Tirol. La Junta provinziala à aprovè incö la scomenciadia nöia che premiëia proieć de cooperaziun transfrontaliera. Al é le pröm iade che chësc concurs vëgn scrit fora.
Le pest Euregio por la cooperaziun gnarà partì sö te döes categories: la pröma categoria tëgn cunt de scomenciadies de colaboraziun suraregionala che é bele gnüdes stlütes jö o che é tla fasa de realisaziun, la secunda categoria premiëia indere les idees de cooperaziun plü interessantes che ne é nia ćiamò gnüdes realisades y che é tla fasa de proietaziun. „Cun chësc concurs – à sotligné incö le Presidënt dla Junta Arno Kompatscher – orunse stimulé dötes les porsones, assoziaziuns, sozietês y istituziuns a svilupé idees y proieć sön les poscibilitês de colaboraziun y de svilup tl raiun dl’Euregio. I premià podess insciö deventè ejëmpli da studié y magari inće da imité.“
I pesć gnarà partis sö danter i pröms trëi dles döes categories: le pröm tlassifiché ciafa n reconoscimënt de 5 mile euro, le secundo de 3 mile euro y le terzo de 1.500 euro. Les candidatöres y i proieć po gnì presentà ćina ai 31 de otober tl ofize dl’Euregio Tirol-Südtirol-Trentin, Alea Druso 1 a Balsan (info@europaregion.info). Por plü informaziuns prëibel vijité la plata inernet: http://www.euroregione.info/ o contatè le TIS che é le partner dl Südtirol por chësta scomenciadia (heiko.schoberwalter@tis.bz.it, tel. 0471 068306).
rc
