Atualità
Le program Interreg V é gnü aprovè: 97miliuns por l’archirida y l’inovaziun
Le program Interreg V é gnü aprovè incö (16 de setëmber) dala Junta provinziala y contëgn prësc 97 miliuns de euro por le sostëgn al’archirida, al’inovaziun, ala competitivité, al patrimone natural y cultural y ala colaboraziun danter les istituziuns. Le proiet reverda la colaboraziun danter sis raiuns regionai dla Talia y dl’Austria.
La proposta dl program Interreg V Talia-Austria presentada incö (16 de setëmber) ala Junta provinziala é gnüda laurada fora da de plü regiuns: dal Südtirol, dal Tirol, dal Venet, dal Friuli-Venezia-Giulia, dal Salzburg y dal Kärnten. Le program à sciöche obietif chël da ciafè soluziuns uniches y coletives por problems che reverda döt le raiun suraregional cun na popolaziun de zirca 5,5 miliuns de abitanć. „Les sfidades de chëstes provinzies é gonot les medemes y insciö é na colaboraziun te chisc ćiamps d’ütl“, à splighé incö le Presidënt dla Provinzia Arno Kompatscher tratan la conferënza stampa do la sentada dla Junta provinziala. La Junta provinziala à aprovè le program y ti à surandè l’inćiaria ala Repartiziun Europa da mët man les consultaziuns de natöra tecnica cun i Ofizi de Bruxelles.
La program aprovè dala Junta prevëiga le sostëgn economich por la promoziun de na colaboraziun te cinch ćiamps. 17,9 miliuns de euro é insciö preodüs por le sostëgn dl’archirida, dl svilup tecnologich y dl’inovaziun. „Chilò se tratarà de raforzè la colaboraziun dles istituziuns d’archirida, mo inće chëra dles aziëndes“, insciö Kompatscher. Atri 12,8 miliuns gnarà metüs a desposiziun por le mioramënt dla competitivité dles aziëndes de picera y media grandëza y che dess portè ala promoziun y al svilup de produć y sorvisc sura i confins fora. Prësc indöt 27 miliuns é preodüs por la valorisaziun dl patrimone cultural y natural, 20,2 miliuns por l’elaboraziun de strategies coletives danter istituziuns desvalies di cinch raiuns. Por les mosöres por le svilup local él inultima preodü na sovenziun de 13 miliuns de euro.
Le plann de finanziamënt complessif dl program Interreg V Talia-Austria arà insciö a desposiziun n budget de 96,8 miliuns de euro por la perioda 2014-2020. 85 porcënt de chisc mesi finanziars vëgn dal fonds europeich por le svilup regional FESR, i 15 porcënt che resta é mesi finanziars statai. Por garantì na gestiun prezisa dl fonds a desposiziun à la Provinzia tut la dezijiun de istituì cinch istanzes de control y d’aministraziun.
rc
