Trafich | 18.09.2014 | 12:52

„S.O.S.Zebra!“: Educaziun ala segurëza y mobilité sostenibla

Portè a plü segurëza sön strada y a n’adoranza costanta dla mobilité ecologica: Chësc é le fin dla campagna de sensibilisaziun „S.O.S.Zebra!“ che é gnüda presentada incö tl Palaz Widmann dal assessur por la mobilité Florian Mussner y dal assessur por la scora y cultura todëscia Philipp Achammer.

L’assessur por la mobilité y por le sorvisc strades Florian Mussner à presentè incö (18 de setëmber) adöm al assessur por la scora y cultura todëscia Philipp Achammer la campagna de sensibilisaziun nöia „S.O.S. Zebra – Segurëza y mobilité ecologica“ che é gnüda metüda da jì dales Repartiziuns Mobilité y Sorvisc Strades en colaboraziun cun l’Ökoistitut Südtirol, la BLS (Standortagentur Südtirol) y le Safety Park. Le Diretur de Departimënt Valentino Pagani à referì che tl 2013 él gnü registré 187 inzidënć cun peduns, cun 245 feris y 7 morć. L’assessur Mussner à sotlignè che por „aumentè la segurëza sön strada y por diminuì i inzidënć él important danter l’ater da informè, eduché y sensibilisé i zitadins te an manira costanta.“Por merit dla colaboraziun danter les Repartiziuns Mobilité y Sorvisc Strades cun l’Ökoistitut Südtirol, la BLS y le Safety Park gnarà la campagna ampliada por le pröm iade inće tles scores elementares, mesanes y altes dl Südtirol.

Les Repartiziuns Sorvisc Strades y Mobilité à insciö laurè fora por la campagna nöia da chësc ann la brosciüra „S.O.S. Zebra!“ cun informaziuns importantes sön le comportamënt y les regoles sön les strisciores pedonales por peduns y autisć. „Les strisciores pedonales é un di punć d’incuntada prinzipai danter peduns, ziclisć y autisć, olache n comportamënt corët y n’atenziun particolara é la basa por evité inzidënć“, insciö l’assessur Mussner. La brosciüra é gnüda ajuntada (tla verjiun ladina) y gnarà inserida sön les plates internet prinzipales dles Repartiziuns Sorvisc Strades y Mobilité y dl Safety Park te ladin, todësch y talian.

La novité plü grana dla campagna „S.O.S. Zebra!“ da chësc ann é la realisaziun de n program d’educaziun por promöie la mobilité ecologica y la segurëza sön strada tles scores elementares, mesanes y altes tl Südtirol. Le program y de plü materai didatics é gnüs realisà dal Ökoistitut Südtirol che presentarà ales scores de döt Südtirol so conzet por definì les ativitês conretes tles scores. „Le program dles ativitês prevëiga por ejëmpl l’identificaziun di prighi sön le trù de scora, eserzizi pratics por ći che reverda la segurëza sön strada y l’adoranza de mesi de trasport ecologics sciöche la roda o i mesi publics, de plü ativitês tl Safety Park, yii.“, à splighé incö Andreas Pichler dl Ökoistitut Südtirol tratan la conferënza stampa che à ajunté che i programs é gnüs elaborà sön la basa di bojëgns desvalis di scolars dala scora elementara ala scora alta.  

I placać cun le logo nü gnarà da incö inant tacà sö sön les gran tofles dlungia strada te döt Südtirol. 

rc

Galaria dales fotografies

Les strisciores pedonales passa amesa na strada dal corù vërt: Le placat cun le logo nü é gnü presentè incö (18/09)

Tratan la presentaziun da incö (d.m.c.): le Diretur de Dep. Valentino Pagani, l'assessur Florian Mussner, l'assessur Philipp Achammer, Harald Reiterer (BLS) y Andreas Pichler (Ökoistitut Südtirol).
Foto: LPA/rc

Downloads