Atualità
Cun na ćiavala Quarter n vijita tles Dolomites patrimone UNESCO
Rudolf Nocker da Sëlva é dai 13 de setëmber sön le iade cun süa ćiavala Quarter Soraya por vijité düć i nü raiuns dles Dolomites che fej pert dla fondaziun UNESCO. Le percurs dl iade fej fora indöt 700 chilometri amesa la natöra, les munts y la contrada dles Dolomites. Do avëi vijité inier (18/09) le Geoparc Bletterbach a Aldein passarà le trù tres Funès ćina Al Plan.
Tres le proiet „Zoruch tl dagnì“ ("Ritorno al futuro"), sostignì dala fondaziun UNESCO y dala Repartiziun Parcs naturai, à Rudolf Nocker da Sëlva tut la scomenciadia da vijité adöm a süa ćiavala Soraya düć i nü raiuns dles Dolomites che fej pert dla fondaziun UNESCO che é partis sö tles cinch provinzies de Balsan, Trënt, Belun, Pordenone y Udine. Nocker é piè ia ai 13 de setëmber y la fin dla vijita é programada por i 19 de otober, n iade che fej fora na destanza de 700 chilometri, cun n deslivel de 44.600 metri en ascensiun y 45.100 en descensiun. La destinaziun finala dl iade é la sënta dla fondaziun Dolomites UNESCO a Cortina d’Ampëz.
En mercui, ai 24 de setëmber dales 10 él preodü n’incuntada de Nockler tla Ćiasa dl parch natural Pöz-Odles a Santa Madalena de Funés cun Florian Zerzer, diretur dl Departimënt Svilup dl teritore, Ambiënt y Energia, Marcella Morandini, secreteria generala dla fondaziun Dolomites UNESCO y cun Robert Messner, ombolt dl Comun de Funés.
Do la vijita di 24 de setëmber tla Ćiasa dl parch natural Pöz-Odles a Funés, jarà le iade de Nockler inant y le portarà en vëndres, ai 26 de setëmber dales 15 tla Ćiasa dl Parch natural Fanes-Senes-Braies a Al Plan y en mertesc, ai 30 de setëmber dales 10 tla Ćiasa dl Parch natural Trei Zinnen (Trëi Pizes de Lorëi) a Toblach.
„I à tut chësta dezijiun da vijité les Dolomites, deache ares é de na belëza unica – insciö Nocker – al se trata de n passaje da n monn caraterisé da luxus, eleganza, glamour, belëza, inovaziun y tecnologia a n monn de natöra, de munts, de cultura y de tradiziuns popolares, mo inće n monn de naturalëza y scemplité.“
Les aventöres y le iade de Rudolf Nocker gnarà inće inserides tosc sön le blog ofizial dl proiet: http://blog.rudolfnocker.com/
rc
Galaria dales fotografies
