Atualità
La Detlaraziun Universala di Dërć dles Porsones śëgn inće por Ladin
439: Chësc é por le momënt le numer dles traduziuns dla „Detlaraziun Universala di Dërć dles Porsones“ (Universal Declaration of Human Rights: UDHR), detlaraziun storica dles Naziuns Unides (ONU) y un di documënć plü significatifs por ći che reverda i dërć dles porsones. La verjiun plü nöia é chëra ladina (idiom dla Val Badia).
Sön scomenciadia dl Ofize Chestiuns linguistiches y dl Ofize Stampa dla Provinzia da Balsan él da püch gnüda inserida sön la plata internet ofiziala dl „Office of the High Commissioner for Human Rights“ (OHCHR) la pröma traduziun tl ladin (idiom dla Val Badia) dl test original dla „Detlaraziun Universala di Dërć dles Porsones“, le documënt storich che é gnü aprovè ai 10 de dezëmber dl 1948 tl Palais de Chaillot a Parigi dales Naziuns Unides (ONU) te süa Reuniun Generala. „La ghiranza dl OHCHR, sciöche detlarè sön süa plata internet, é chëra da fà conësce le test le plü poscibl sura döt le monn y amesa düć i grups etnics y linguistics y vigni traduziun é n contribut al ampliamënt dles conescënzes sön i dërć universals dles porsones“, insciö l’assessur por la scora y cultura ladina Florian Mussner.
Chëra ladina é la 439ejima traduziun de chësc document storich che é gnü metü adöm do les esperiënzes dramatiches tl tëmp dla secunda vera mondiala. Cun la Detlaraziun di Dërć dles Porsones detlarëia les Naziuns Unides y sü Stać mëmbri la promoziun y la proteziun di dërć individuai dles porsones nominà tl documënt. La Detlaraziun dl 1948 vëgn conscidrada le pröm documënt che garantësc la proteziun di dërć dles porsones te na manira universala (te vigni perioda dla storia y sön vigni pert dl monn).
La Detlaraziun universala di dërć dles porsones é partida sö te n pream y te 30 articui che garantësc i dërć individuai, zivils, economics, culturai, soziai y politics de vigni porsona. I dërć individuai de vigni porsona vëgn partis sö te döes gran arees: i dërć zivils y politics y i dërć culturai, soziai y economics. La traduziun ladina é da ciafè chilò:
http://www.ohchr.org/EN/UDHR/Pages/Language.aspx?LangID=lld
rc
