Atualità
Revijiun dles spëises dl'aministraziun publica: I proscimi vari é stabilis
Le Presidënt dla Provinzia Arno Kompatscher y l’assessuria por l’aministraziun Waltraud Deeg s’à incuntè incö (23 de setëmber) cun i rapresentanć di sindacać y di daturs de laûr por stlarì i proscimi vari por ći che reverda l’inovaziun dl’aministraziun. Tl zënter dla discusciun él stè la nominaziun de na comisciun, che dess inće ester la fondamënta por la reorganisaziun dl bilanz provinzial.
Adatè l’aministraziun ai mudamënć dla sozieté y miorè l’efiziënza: Chisc é i obietifs dl proiet „Inovaziun dl'Aministraziun 2018“ che é gnü metü da jì dala Junta provinziala. „Chësc proiet gnarà realisé adöm cun la partezipatiun di suranstanć y colaboradus dl’aministraziun publica“, à splighé l’assessuria por l’aministraziun Waltrad Deeg che à presentè incö le proiet de reorganisaziun y inovaziun dl'Aministraziun publica adöm al secreter general Eros Magnago y al diretur general Hanspeter Staffler.
Le proiet d’inovaziun se basëia sön trëi pilastri. „Le pröm pilaster, la reorganisaziun dles competënzes, é metü adöm dales inćiaries che l’aministraziun publica surantol y da sciöche ara é organisada“, insciö Deeg. Le secundo reverda l’otimisaziun dl’efiziënza por respogne ales inćiaries surantutes: „La resposta é chilò na scemplificaziun dl’aministraziun“, insciö l’assessuria.
Le terzo pilaster reverda l’ejaminaziun dles inćiaries, à sotligné Deeg. Le conzet prinzipal por ći che reverda chësc terzo pilaster é le „zero base budgeting“, insciö le Presidënt Kompatscher incö che à ajuntè: „I metun le bilanz provinzial a zero, sciöche ùn bele anunzié tl program de govern. Ara ne se trata nia en pröma ligna de sparagné, mo da mët adöm n bilanz cun chël che sun bugn da respogn ales sfidades dl dagnì, inće por ći che reverda i mudamënć demografics y l’aumënt de pretejes che nasciarà adinfora.“
Por invié ia, coordiné y controlè les spëises dles unitês singules dl’aministraziun él gnü istituì n organn de esperć, la „comisciun por la revijiun dla spëisa publica“, che ejaminarà y coordinarà les unitês singules tl prozès d’ejaminaziun y de control dla spëisa publica tres le conzet dl „zero base budgeting“ (por ći che reverda la revijiun dl’efiziënza y dla conveniënza dles spëises dles unitês cun l’obietif da individué poscibilitês de sparagn). Atres competënzes dla comisciun é: racomanaziuns por la compilaziun di bilanć por ći che reverda l’adoranza dles ressurses plü efiziëntes, le svilup de prozedimënć por la spending review, l’assunziun de inćiaries de control por ći che reverda i proieć preodüs tl prozès da reorganisaziun tres le proiet „Inovaziun dl'Aministraziun 2018“ y elaboraziuns de arać por ći che reverda la tematica dla spëisa publica.
La comisciun sarà metüda adöm da cinch esperć: trëi mëmbri gnarà nominà dal Consëi provinzial, dui dala maioranza, un dal’oposiziun, implü gnaràl chirì fora dui esperć sön proposta di rapresentanć di sindacać y dles organisaziuns di daturs de laûr.
„Cun l’incuntada da incö ti él gnü surandè l’inćiaria ales organisaziuns soziales da portè dant les propostes di candidać che corespogn al profil profescional damanè“, insciö l’assessuria Deeg. Do la presentaziun dl profil profescinal arà i sindacać y les organisaziuns di daturs de laûr 60 dis de tëmp por dè jö sües propostes, por che la comisciun pois mët man da laurè tl 2015.
rc
Galaria dales fotografies
