Atualità
Zentrala dl Pröm Aiüt: Barat d’informaziuns danter Balsan-Desproch
Les poscibilitês de na colaboraziun tl setur dl pröm aiüt é gnüdes analisades inier, lönesc ai 22 de setëmber, tratan na vijita ala Zentrala dl Pröm Aiüt da Desproch („Leitstelle Tirol“) da pert dl assessur por la proteziun zivila Arnold Schuler y dl assessur dl Land Tirol Josef Geisler.
La „Leitstelle Tirol“, gnüda metüda sö tl 2005, é de proprieté dl Land Tirol y le rapresentant dla Zentrala dl Pröm Aiüt é l’assessur por la proteziun zivila dl Land Tirol, Josef Geisler. La Zentrala de Pröm Aiüt é le punt de coliamënt y de gestiun dla segurëza zivila y manajëia vigni ann sura 100 mile intevënć d’emergënza y ciafa söporjö n mez miliun de telefonades al ann.
Tl 2013 é les telefonades stades indöt 413.000, 116.000 é stà i intervënć, de chisc 8.326 cun l’elicoter (la zentrala à a desposiziun ot elicotri tratan döt l’ann, plü set che vëgn laprò tratan les sajuns turistiches). La „Leitstelle Tirol“ é da arjunje atualmënter tres i numeri 122, 144, 140 y 141. Tla Zentrala dl Pröm Aiüt dl Tirol laorel 75 colaboradus che garantësc le sorvisc 24 ores sön 24 tratan döt l’ann.
Por ći che reverda l’istalaziun de n numer unich por les emergënzes te döt l’Europa, le 112, él inće gnü sotligné les poscibilitês de na colaboraziun transforntaliera tres le proiet Interreg Talia-Austria. N’acordanza de basa sön la colaboraziun te chësc vers é inće gnüda arjunta danter l’assessur Schuler y l’assessur dl Land Tirol Josef Geisler.
I dui assessurs é gnüs acompagnà tratan la vijita dal Diretur dla Repartiziun Sanité, Thomas Matha, y dal diretur dla Zentrala de Pröm Aiüt „Leitstelle Tirol“, Martin Eberharter. La vijita é gnüda metüda da jì dal managing director dla Leitstelle, Gernot Vergeiner.
rc
Galaria dales fotografies
