Atualità
Dala Junta: Internet aslöm y fires otiches, fonds ala RAS y intervënć nüs
L’impëgn dla Provinzia por portè l’internet aslöm sön döt le teritore dl Südtirol va inant. Por amplié l’azès dles families y dles dites ai colegamënć internet sigüsc y asvelć à la Junta provinziala aprovè incö (ai 23 de setëmber) l’aumënt dl finanziamënt dl’ativité dla RAS (Rundfunkanstalt Südtirol) da 10 a 20 miliuns de euro por la realisaziun dles infrastrotöres por l’internet asvelt.
L’internet aslöm à aldedaincö l’importanza che les rëis dles ferates y dles strades à albü ti dezenns passà, ares é de importanza fondamentala por la chersciüda dla sozieté südtiroleja, dandadöt por ći che reverda le sostëgn al svilup economich, cultural y politich sön döt le teritore. La Junta provinziala porta insciö inant le proiet "Wir vernetzen!" che prevëiga la realisaziun de na rëi telematica provinziala sön döt le teritore dl Südtirol. Plü dezijiuns é insciö gnüdes tutes incö dala Junta provinziala, sciöche le Presidënt dla Provinzia, Arno Kompatscher, à sotligné tratan la conferënza stampa do la sentada edemala dla Junta.
Le pröm vare reverda insciö i mesi finanziars metüs a desposiziun ala RAS (“Radiotelevisione Azienda Speciale”) tres le fonds de rotaziun da 50 miliuns che vëgn aministré dala Alto Adige Finance. La soma totala dl fonds romagn invariada, al intern de chësc fonds passa indere le contribut finanziar por l’ativité dla RAS da 10 a 20 miliuns. “La RAS s’ocupëia adöm al Ofize Infrastrotöres dla realisaziun dla rëi telematica provinziala y po cun i mesi finanziars nüs aprescè i laûrs”, insciö Kompatscher.
Implü à la Junta provinziala dè jö n arat positif sön la realisaziun de cater trates nöies de ros cun la fira otica. L’investimënt plü alt é de 1,15 miliuns de euro y reverda le coliamënt cun l’internet aslöm tres la fira otica ti Comuns dl Unterland y le coliamënt ala rëi inće dles zentrales dla Telecom che ne pita nia ćiamò le sorvisc ADSL.
936.000 euro é gnüs aprovà por mëte jö i ros por les fires otiches che coliëia la Val dl Sarenthein cun le Comun de Villanders, 183.000 euro gnarà investis por portè l’ADSL ti Comuns de Nals y Tisens y 135.633 euro é preodüs por le completamënt dla rëi dles fires otiches tres le colegamënt cun la zentrala Telecom sön la Munt de Suc.
“I ùn tut la dezijiun da aprescè le completamënt di colegamënć cun les zentrales Telecom y la realisaziun di PoP ti Comuns por miorè le livel de curida sön le teritore y por podëi mët man da adorè i standarg nüs dla trasmisciun di dać”, à sotrissé Kompatscher che à ajuntè: “L’obietif è chël da mët a desposiziun le sorvisc le plü debota che ara va, inće deache les dites dess avëi la poscibilité da podëi mantignì sü standarg de competitivité. Insciö dess por la fin dl 2015 le 99,5 porcënt di zitadins dl Südtirol avëi la poscibilité da podëi anuzé de n colegamënt internet asvelt y sigü cun na capazité de trasmisciun ćina a 20 Mbit/s.”
rc
