Atualità
Dala Junta: 30 miliuns de euro por le frabiché abitatif y por l’economia
Cun n aumënt dles ressurses finanziares de 30 miliuns de euro gnaràl smendris i tëmps de speta por finanziamënć ti seturs dl frabiché abitatif y dl’economia. Chësta dezijiun é gnüda tuta incö (23 de setëmber) dla Junta provinziala che à partì sö te plü capitui i finanziamënć che vëgn dai fonds dla Regiun.
Cun 30 miliuns aumentëia la Junta provinziala i mesi finanziars a sostëgn dl'economia y dl frabiché abitatif. „I orun adorè chisc 30 miliuns implü por sostignì i Comuns sön les zones d'espanjiun y por paiè fora i aretrać pro i contribuć y i imprësć", à splighé le Presidënt Kompatscher che recorda che "por smendrì i tëmps de speta di privać y dles dites gnaràl inće aumentè le fonds de rotaziun."
Di 30 miliuns aprovà dala Junta gnarà 10 miliuns metüs a desposiziun por curì i aretrać pro le finanziamënt de investimënć tl setur dl’agricoltöra. “Le contribut plü alt de 11 miliuns gnarà metü tl fonds de rotaziun por la sovenziun al’economia, sciöche impuls por smendrì i tëmps de speta pro i imprësć alisirà, por pormët investimënć y por ti assiguré na sbürla al’economia”, à sotligné le Presidënt Kompatscher incö.
L’assessur por le frabiché abitatif Christian Tommasini à recordè che atri 5 miliuns gnarà metüs a desposiziun por finanzié la cumpra da pert di Comuns de arees por frabiché y por i cosć por l’urbanisaziun: “A chësta manira podunse inće ti dè na resposta positiva a dötes les domandes presentades ćina setëmber dai Comuns y che reverda la realisaziun de zones d’espanjiun. Cun i 5 miliuns de euro aprovà podunse finanzié i contribuć por la cumpra y i cosć por l’urbanisaziun”, à stlarì Tommasini. Inultima él gnü tut la dezijiun da aumentè cun cater miliuns le fonds de rotaziun istituì por sostignì intevënć de ressanamënt de frabicać esistënć.
rc
