Atualità
Dala Junta: Aprovè le finanziamënt por n palaz dla dlacia nü a Bornech
A Bornech gnaràl realisé n palaz dla dlacia nü. Le finanziamënt por la realisaziun dl frabicat nü é gnü aprovè incö (23 de setëmber) dala Junta provinziala. „Insciö saràl inće Bornech che arà n palaz dla dlacia modern“, à splighé l’assessur por i laûrs publics Christian Tommasini.
"Les fondamëntes dl palaz dla dlacia atual a Bornech, che vëgn anuzé inće dala scuadra de hockey dl HC Pustertal por sües partides de ćiasa, é gnüdes costruides dan da presciapüch 50 agn, inće le tët é valgügn dezenns vedl. La strotöra ne é insciö nia plü adatada por na scuadra de hockey a livel profescional“, à splighé incö (23 de setëmber) l'assessur por i laûrs publics Christian Tommasini tratan la conferënza stampa.
La Junta provinziala à insciö aprovè la realisaziun de n implant nü tl raiun dla zona scolastica da 15 miliuns de euro. Le Comun da Bornech surantol na pert dles spëises por indöt de 4,5 miliuns de euro, 5 miliuns gnarà metüs a desposiziun dal fonds de rotaziun y i 5,5 miliuns che resta por completè le finanziamënt gnarà curis dala Provinzia. „Insciö podaran concretamënter laurè sön la realisaziun dl implant, cun l'aministraziun comunala che sarà responsabla por la realisaziun di laûrs“, à dit l’assessur Tommasini.
La basa por la costruziun de n implant nü é gnüda aprovada bele dan da n ann tres na deliberaziun dl Comun, intratan él inće gnü individué le tòch de grunt adatè por le frabicat nü. „Le grunt vëgn metü a desposiziun dal Comun y tol ite n'area de presciapüch 15.000 metri cuadrać“, à stlüt jö Tommasini.
rc
