Atualità
Dala Junta: Stüde de fatibilité dla varianta de Riga
La Junta provinziala à aprovè incö (23 de setëmber) na seria de mudaziuns al program dles mosöres de compensaziun ambientala por la costruziun dl tunel de basa dl Prener te cater comuns: Franzensfeste, Freienfeld, Pfitsch y Vahrn. Danter les novitês él la realisaziun dla ligna dla tenjiun alta sot tera y n stüde de fatibilité dla varianta de Riga („Riggertalschleife“).
„Do l’aprovaziun dles mosöres de compensaziun por la costruziun dl tunel de basa dl Prener tl 2009 cun n valur de 50 miliuns de euro s’âl presentè la nezescité da atuè mudaziuns al program inizial“, à splighé le Presidënt Kompatscher incö (23 de setëmber) y à detlarè che la Junta provinziala à aprovè mudaziuns te cater Comuns.
Danter l’ater él inće gnü stabilì le finanzimënt de n stüde de fatibilité por la realisaziun dla varianta de Riga („Riggertalschleife“) che prevëiga n colegamënt diret danter la Val de Puster cun Porsenù zënza messëi passè por la staziun de Franzensfeste. „Cun chësc proiet gnissel aumentè l’atrativité dla mobilité tres les scines y chësc portass a na sconanza plü ampla dl ambiënt, porchël che i ùn podü finanziè le stüde dal program dles mosöres de compensaziun ambientala“, insciö Kompatscher. Le stüde de fatibilité ti gnarà spo surandè ala RFI (Rete Ferroviaria Italiana), la sozieté che à en gestiun les lignes dla ferata tla Talia.
Le proiet plü gran romagn indere la realisaziun dla ligna dla tenjiun alta sot tera a Mauls tl Comun de Freienfeld che é gnüda inserida, do consultaziuns tecniches che à dè n arat positif sön la realisaziun dl'operaziun, tl program dles mosöres de compensaziun ambientala.
rc
