Atualità
Ejams de bi- y trilinguism,iscriziuns plü asveltes cun la Chërta di sorvisc
Se scrì ite ai ejams de bi- y trilinguism é tres plü saurì y asvelt: la pröma novité é gnüda ativada de novëmber cun la poscibilité da stlü jö les prozedöres d’iscriziun online cun la Chërta di sorvisc, la secunda novité gnarà arjignada ca por le proscimo mercui, ai pröms de otober: la Chërta di sorvisc podarà insciö gnì ativada da chël dé inant diretamënter tl Sorvisc Ejams bi- y trilinguism.
„Ćina śëgn êl ma poscibl da ativè la Chërta sorvisc tl Comun de residënza. Cun chësta prozedöra – à comentè le Presidënt dla Junta Arno Kompatscher – ti pitunse ai zitadins n sorvisc implü por se scrì ite ai ejams te na manira plü scëmpla diretamënter dal computer, tablet o smartphone.“ L’Ofize Sorvisc Ejams bi- y trilinguims é da ciafè a Balsan, strada Dr. Julius Perathoner 10 (tel. 0471 413900).
Por se scrì ite ai ejams ne él insciö nia plü debojëgn da scrì fora formulars y da menè inant lëtres d’iscriziun. Ćina śëgn s’à anuzé dl sorvisc tres l’internet söporjö 1000 porsones por se iscrì ai ejams de bi- y trilinguism, por damanè do zertificać o por se fà reconësce zertificać de conescënza linguistica y titui de stüde.
„L’iscriziun online por i ejams de bi- y trilinguism é por trames les perts n davagn“, à sotligné l’assessuria por l’informatica Waltraud Deeg, „da öna na pert por le candidat che sparagna tëmp y ciafa na resposta asvelta y dal’atra pert é les prozedöres aministratives gnüdes plü scëmples, ći che porta a n smendrimënt dla perzentuala de fai.“
Por düć chi che ô se scrì ite tres la Rëi Zivica ai ejams de bi- y trilinguism po le fà tlican sön: http://www.provinzia.bz.it/la/sorvisc/sorvisc-categories.asp?bnsvf_svid=1008020. Informaziuns plü avisa sön i ejams pon indere ciafè chilò: http://www.provincia.bz.it/el/default.asp.
rc
