Atualità
Fiera dla Formaziun "Futurum" dai 2 ai 4 d’otober a Balsan
La formaziun y l’ocupaziun é al zënter dla cuinta ediziun „Fiera dla Formaziun Futurum 2014“ dai 2 ai 4 de otober tla sënta dla Fiera a Balsan. La fiera é gnüda presentada incö, jöbia ai 25 de setëmber dai trëi assessurs provinziai por la scora Florian Mussner, Philipp Achammer y Christian Tommasini y ofrësc a scolars y geniturs na suraodüda generala sön le monn dla formaziun y dl laûr.
Formaziun y ocupaziun é le moto dla cuinta ediziun dla Fiera dla Formaziun Futurum 2014 dai 2 ai 4 de otober y che pita na suraodüda sön les propostes formatives dl monn dles scores altes y profescionales, dla formaziun profescionala, dles Universitês tl Südtirol y tles vijinanzes sciöche inće dles profesciuns plü praticades tl Südtirol. Al gnarà ofrì na suraodüda sön i percursc formatifs y profescionai dales scores altes inant ćina ala formaziun universitara y permanënta sön le laûr. L’interaziun danter le monn dl laûr y la formaziun profescionala sarà al zënter dla Fiera.
„La Futurum é na buna ocajiun d’informaziun por scolars, studënć y geniturs por s’informè diretamënter sön i stüdi pità, sön l’orientamënt dl’educaziun futura y dl’monn dl laûr sciöche sön les poscibilitês dl’educaziun permanënta," à splighé l'assessur por la scora ladina Florian Mussner che à inće recordè les sterches dla scora paritetica ladina dandadöt por ći che reverda so orientamënt europeich y plurilingual. „La funziun dla fiera é chëra da informè i studënć y scolars sön dötes les alternatives dles scores de secundo livel, dla formaziun profescionala y dles prospetives de laûr por che düć interessà pois to la dezijiun sön so percurs de formaziun y spo daldô de laûr te na manira coscënta“, à splighé l’assessur por la scora todësca Philipp Achammer incö tratan la presentaziun dla Fiera 2014.
Tratan la Fiera gnaràl presentè implü le sistem de formaziun dual dl Südtirol, n’atenziun particolara ti gnarà dada implü ala scomenciadia MINT che à sciöche obietif la promoziun dles materies tecniches y scientifiches sciöche la matematica, l’informatica, les sciënzes naturales y la tecnica. La Fiera dla Formaziun 2014 é ponsada dandadöt por scolars dla secunda y terza tlassa dles scores mesanes, por scolars di ultimi dui agn dles scores profescionales y dles scores altes, por geniturs, personal didatich, studënć y interessà ala formaziun profescionala y permanënta.
Gert Lanz, presidënt dl’assoziaziun di artejans dl Südtirol Lvh-Apa à presentè le campionat provinzial dles profesciuns („Landesmeisterschaft – Berufe im Wettbewerb“) che gnarà tignì te indöt 26 profesciuns tl setur dl’artejanat, tl’agricoltöra, tl turism tla gastronomia y che ti pita insciö la poscibilité ai vijitadus da imparè da conësce da plü daimprò i laûrs praticà tl Südtirol. Un di apuntamënć plü importanć dla Futurum sarà la „Bildungskonferenz 2014“ (conferënza por la formaziun) dai 2 ai 4 de otober che pita plü seminars y presentaziuns sön plü tematiches dla formaziun y dles profesciuns tl Südtirol. Por plü informaziuns: www.futurum.it
La Fiera Futurum vëgn organisada dala Ofize Promoziun dl Stüde, Univeristè y Inrescida Scientifica adöm cun i Departimënc dla scora todëscia, taliana y ladina, dai Ofizi Formaziun permanënta dla Cultura todëscia y taliana, dala Repartiziun Laûr, sciöche inće dal LVH-APA y dala Fiera Balsan.
rc
