Atualità
Kompatscher incunta Lupi: conzesciun dl’A22 y cofinanziamënt dl BBT
Incö (25/09) él gnü fat „n vare important“ por ći che reverda la prorogaziun dla conzesciun por l’autostrada dl Prener (A22) dal Presidënt dla Provinzia Arno Kompatscher y dal Presidënt dl Trentin Ugo Rossi tratan l’incuntada a Roma cun le Minister dles Infrastrotöres Lupi. Al é inće gnü definì plü avisa le co-finanziamënt dla sozieté dl'A22 por la realisaziun dl BBT y dles trates d’azès.
L’incuntada di dui presidënć dles Provinzies y dl aministradù general dl’A22 Walter Pardatscher cun le Minister Maurizio Lupi é gnüda tignida incö (25 de setëmber) por porvè da definì i tëmps, i prozedimënć y i obietifs dl inserimënt dla prorogaziun dla conzesciun por l’A22 tl decret „Sblocca Italia“ metü da jì dal govern. Ćina mez novëmber (perioda canche le decret gnarà convertì te na lege) ti presentarà insciö la sozieté Autobrennero Spa al govern les propostes laurades fora ti ultimi mëisc, che gnarà spo menades inant tres n dossier ala Uniun Europeica.
Le Presidënt dla Provinzia Kompatscher sotlignëia, che un di punć dl’acordanza sön la prorogaziun dla conzesciun é l’adoranza di mesi finanziars che é gnüs metüs da pert dala Autobrennero Spa, sozieté che à en gestiun l’autostrada, por le finanziamënt dl tunel de basa dl Prener: „I 550 miliuns che vëgn dala sozieté Autobrennero Spa dess insciö gnì investis por la realisaziun dl BBT, por les trates d’azès y por mosöres ajuntives, por garantì le passaje dl trafich dles marćianzies dala strada sön les scines.“
„I oressun ester i pröms che à la poscibilité da anuzé le decret „Sblocca Italia“: nosta proposta porta vantaji sides por les provinzies che por le govern statal. Le govern, y chël é inće gnü sotlignè incö, à l’orentè da realisé proieć da de gran dimenjiuns por modernisé les infrastrotöres y stabilisé le marćé dl laûr“, à splighé le Presidënt Rossi do l’incuntada.
rc
