Atualità
Schuler inaugurëia le Laboratore Dolomites: svilup, ambiënt y segurëza
„I messun ciafè la dërta combinaziun de mosöres y provedimënć por la coesistënza dl svilup economich cun la sconanza dl ambiënt y la segurëza di zitadins.“ Cun chëstes parores à inaudé l’assessur Arnold Schuler le Laboratore Dolomites, n’incuntada de cater dis cun discusciuns sön l’ega sciöche tematica zentrala.
„Les conescënzes sön i prighi naturai presënć tl Südtirol tres la planificaziun dles zones de prigo nes mët dant gran sfidades tl dagnì por ći che reverda la proteziun dan da desgrazies naturales, la planificaziun dl teritore y la costruziun de mosöres de proteziun“, à splighé incö (25 de setëmber) l’assessur por la proteziun zivila, agricoltöra, costruziuns idrauliches y ënć locai Arnold Schuler. Öna dles tematiches prinzipales é insciö l’ega che fej pert de prësc vigni sfera dla vita privata y publica, dal consum privat al’agricoltöra ćina ala produziun de eletrizité.
L’ega é inće un di argomënć zentrai dl Laboratore Dolomites, n’incuntada de cater dis a Sanćiana dedicada al anuzamënt inteligënt y economich dl ega sciöche ressura. „L’ega é n patrimone de düc – à ajuntè Schuler – y ara é na tematica che dess gnì tratada te na manira plü organica y cun idees y conzeć che reverda le dagnì.“
L’importanza dl’ega por le Südtirol s’à inće manifestè ti ultimi mëisc tres les novüdes dl ultimo invern y le ri tëmp di mëisc da d’isté. „I sun amesa na fasa de cambiamënć dl tlima de gran dimenjiuns y le Südtirol, sciöche raiun alpin y caraterisé dales munts, é öna dles zones plü a risch por ći che reverda evënć che porta cun sè prighi por la proteziun dla sozieté“, à dit l’assessur Schuler.
Por smendrì i prighi él important, tres do la minunga de Schuler, da „combiné mosöres y intervënć inteligënć y sostenibls por garantì la coesistënza dl svilup economich cun la sconanza dl ambiënt y la segurëza di zitadins.“ Por arjunje chësc fin – à stlüt jö l’assessur – él important che les istituziuns, i grups d’interès y i zitadins laoress adöm, sciöche por ejëmpl cun la scomeciadia dl Laboratore Dolomites, n bun ejëmpl te chësc vers.
rc
