Atualità
Nocker y Soraya é rovà a Funès: Vijita ala Ćiasa dl Parch Natural
Tratan so iade a pé y a ćiaval amesa le patrimone natural dles Dolomites Unesco s’à Rudolf Nocker da Sëlva y süa ćiavala Soraya archité a Funès por na vijita ala ćiasa dl Parch Natural Pöz-Odles a Santa Madalena de Funès. Danter l’ater él gnü debatü en chësta ocajiun sön na mobilité plü sostenibla tl raiun dles Dolomites.
Le begnodü tla Ćiasa dl Parch Natural ti é gnü dè a Rudolf Nocker da Florian Zerzer, diretur dla Repartiziun Natöra, contrada y svilup dl teritore, Marcella Morandini, secreteria generala dla fondaziun Dolomites UNESCO, Robert Messner, ombolt dl Comun de Funès y dai mëmbri dl curs metü da jì dala fondaziun por deventè acompagnadus da jì sö por munt. Rudolf Nocker é piè ia ai 13 de setëmber cun süa ćiavala Soraya por descurì a pé y a ćiaval les belëzes dla natöra te düć i raiuns dles Dolomites che fej pert dl patrimone natural dl UNESCO. Süa scomenciadia vëgn sostignida dal Ofize Parcs naturai y dala fondaziun UNESCO.
Öna dles tematiches zentrales tratan l’incuntada é stada les sfidades por na mobilité ecologica y sostenibla tl raiun dles Dolomites. Matthias Wagner à insciö presentè n valgügn resultać de n’inrescida dl’EURAC por chëra che la fondaziun UNESCO à dè l’inćiaria y che é gnüda stlüta jö da püch. „La situaziun tles Dolomites é indlunch anfat, olache al vëgn pité alternatvies al anuzamënt dl auto vëgn chëstes inće anuzades dai vijitadus“, insciö Wagner che à dit che ejëmpli te chësc vers é da odëi dantadöt ti raiuns de Pöz- Odles, dl Scilier-Ćiadinac-Latemar y dles Dolomites dl Brenta. Impò él ćiamò dui terzi di vijitadus che arjunj le punt de partënza de süa escursciun tres l’auto y les sfidades dl dagnì sarà insciö da sostignì y amplié l’oferta di mesi de trasport publics y di trus dles rodes y da jì a pé, insciö Wagner.
Cun süa escursciun a ćiaval, lungia presciapüch 700 chilometri, oress Rudolf Nocker „vire l’esperiënza dla forma plü vedla y ecologica dla mobilité tles Dolomites“, le jì a pé sö por munt. Ćina ai 19 de otober sarà Nockler sön le iade cun süa ćiavala Soraya por vijité ćiamò les Dolomites ti raiuns dla Marmolada, de Belun y tl Friul passan inće por Pelmo-Croda da Lago tla Provinzia de Belun. Ala fin de süa escursciun rovarà Nocker a Cortina olache al é la sënta dla fondaziun Dolomites UNESCO.
rc
Galaria dales fotografies
