Atualità
"Agenda digitala 2020": Le dagnì digital dl Südtirol pëia ia dal web
Co dess pa le dagnì digital tl Südtirol ćiarè fora? La resposta dla Provinzia à inom „Agenda digitala 2020“.L’assessuria Waltraud Deeg à presentè incö (26 de setëmber) tla sënta dla Südtirol Informatik AG (SIAG) le proiet de interaziun y co-gestiun dl svilup digital tres l’aiüt y les idees dla popolaziun. Ćina ai 8 de novëmber él poscibl da fà para tres la plataforma internet SD2020.provinz.bz.it
Inće tl Südtirol él le prozes de digitalisaziun di sorvisc pità dal’Aministraziun publica che va inant. „Por ti dè l’oportunité a plü zitadins poscibl da colaborè por l’orientamënt nü dla digitalisaziun tl Südtirol ùnse svilupé n plann cun na plataforma internet olache les propostes de nüsc esperć vëgn presentades y olache les porsones che anüza i sorvisc po fà sü comentars por miorè la comunicaziun online tres la tecnologia informatica“ à dit incö l’assessuria por l’informatica Waltraud Deeg che à ajunté che le fin dl prozès é la scemplificaziun di sorvisc por i zitadins y les dites tres la digitalisaziun dles prozedöres.
I esperć dl’aministraziun publica y dla SIAG à insciö laurè fora n documënt de basa che é gnü presentè incö (26 de setëmber) da Kurt Pöhl, diretur dla SIAG y dla Repartiziun Informatica. Chësc documënt é partì sö te cater perts: economia, aministraziun, sozieté y formaziun digitala y infrastrotöra. Tres la plataforma online www.sd2020.provinz.bz.it él poscibl da valuté, comentè y inserì ćina ai 9 de novëmber idees y propostes sön chisc cater argomënć che svilupëia inant le prozès de digitalisaziun tl Südtirol.
„Sön la basa dles conescënzes profescionales di esperć orunse insciö abiné adöm les esperiënzes di zitadins por les integrè tl proiet de digitalisaziun“, insciö Deeg. Implü gnaràl inće damanè do les minunghes y i arać de grups d’interès di ćiamps dl’economia, dla formaziun, dl’aministraziun y di assoziaziuns di sindacać y di daturs de laûr. „Na poscibilité implü por dè jö süa minunga arà i zitadins y interessà tratan la fiera da d’altonn che vëgn tignida de novëmber a Balsan“, à stlüt jö Deeg.
I resultać dles inrescides gnarà integrà tl conzet de basa „Agenda digitala 2020“, che ti gnarà presentà ala fin ala Junta provinziala por so arat y süa aprovaziun finala.
Plü informaziuns sön:
rc
Galaria dales fotografies
