Atualità
I orientamënć nüs dla sanitè é gnüs presentà dal'assessuria Stocker
L’assessuria provinziala por la sanité Martha Stocker à presentè incö danmisdé te na conferënza stampa tl Palaz Widmann l’orientamënt nü dla sanité cun l’inom „Assistënza sanitara – Südtirol 2020“.
„L’assistënza sanitara dl Südtirol à n standard de cualité alt y n’oferta sanitara dër ampla te düć i ćiamps. Mo i podun s’aspetè de gran sfidades: n numer tres majer de amarà cronics, de majeres aspetatives da pert di paziënć, manćianza de doturs spezialisà, smendrimënt dl bilanz. La chestiun fondamentala é chësta: co podunse pa assiguré inće tl dagnì le medemo livel cualitatif d’assistënza sanitara?“, chëstes les parores cun chëres che l’assessuria por la sanité Martha Stocker à metü man incö (26 de setëmber) la conferënza stampa de presentaziun di orientamënć nüs dl svilup dla sanité cun l’inom“Assistënza sanitara – Südtirol 2020“. Presënć é stà ala conferënza stampa düć i suranstanć prinzipai dla sanité tl Südtirol.
„Cualité dl’assistënza sanitara orarà dì tl dagnì dandadöt assiguré n’assistënza sanitara te na manira unitara sön döt le teritore dl Südtirol y mëte a desposiziun na medejina dër spezialisada te zëntri aposta“, à sotligné l’assessuria Stocker tratan la conferënza stampa.
Al va debojëgn da laurè fora danü y revaluté l’assistënza sanitara sciöche n sistem metü adöm da plü partners colegà te na rëi un cun l’ater. „Les strotöres mëss se reorienté por ći che reverda na colaboraziun funzionala y la responsabilité de gestiun dl’Aziënda sanitara mëss gnì unificada“, insciö à dit l’assessuria provinziala por ći che reverda les linies diretives dl’organisaziun nöia dl’assistënza sanitara provinziala y à ajuntè che „n’atenziun particolara ti gnarà dedicada al anuzamënt responsabl di mesi finanziars desponibli y chësc ô inće dì na majera responsabilisaziun dles porsones che anüza le sistem.“
I orientamënć dl svilup indicà dal’assessuria Martha Stocker é gnüs definis sön trëi punć fondamentai: raforzè l’assistënza sanitara sön basa locala, realisé le miù livel de cualité ti set ospedai provinziai y assigurè le finanziamënt dl’assistënza sanitara provinziala te na perioda lungia.
I partners dla rëi sanitara dla Provinzia é rapresentà, tres aladô de Stocker, da düć i sorvisc y les strotöres atives daìte y defora dla Provinzia, dandadöt dai doturs de basa, dai spezialisć privać, dales êfons, dales apoteches, dai raiuns sanitars, dai sorvisc de pröm aiüt dl 118, dales tliniches convenzionades y dai ospedai y zëntri de terapia. A düć chisc auturs ti él gnü damanè na „colaboraziun strënta“ y l’ativaziun de na rëi por ći che reverda le profil tecnich. L’ativaziun de na rëi dess insciö garantì la realisaziun de n bojëgn fondamental dl’azessibilité 24 ores sön 24, de n contat scemplifiché y de n’informaziun asvelta. Na pert fondamentala por ći che reverda l’assiguraziun de n’assistënza y de cura ti é inće surandada ai doturs de basa che mëss gnì renforzà tres la medejina de grup y tres l’ativaziun de na rëi y garantì insciö l’azessibilité 24 ores sön 24 sön n model sciöche les "apoteches de turnus“ garantësc bele.
Implü déssel nasce n „care management“ che garantesces te na manira unificada l’oferta de assistënza y consulënza. Chësc raforzamënt dl’assistënza sön le teritore ti jiss adicuntra, secundo la valutaziun di esperć che fej pert dla scuadra dl’assessuria Stocker, ai amarà cronics y ess sciöche obietif inće le smendrimënt dla cuantité de laûr por i ospedai.
„Al romagn insciö operatifs i set ospedai provinziai y ai vëgn potenzià de n livel cualitatif plü alt sön la basa dl model progressif –raiun sanitar – provinzia“, à sotligné l’assessuria Stocker. Sce l’assistënza de basa romagn insciö la medema te düć set i ospedai; ti raiuns sanitars gnaràl aministrè i leć de emergënza, y por ći che reverda la medijina plü spezialisada él preodü öna na strotöra che pîta chisc sorvisc, mo cun standarg de cualité d’ezelënza. „Al é important che düć chisc reparć d’ezelënza ne vëgnes nia metüs automaticamënter tl ospedal provinzial de Balsan“, a sotligné l’assessuria Martha Stocker.
Na chestiun complicada dl orientamënt nü dla sanité provinziala é le finanziamënt costant tl tëmp di standarg cualitatifs dl’assistënza provinziala. „Por le momënt é le cost dla sanité tl Südtirol de 3,3 miliuns de euro al dé. Chësc ann aumëntarà i cosć complessifs dla sanité de indöt 20 miliuns por gauja dl aumënt di prisc y dl majer anuzamënt di sorvisc sanitars“, à dit Stocker. I ospedai fej fora dui terzi di cosć, un n terzo vëgn dè fora por l’assistënza sanitara y de cura che ne fej nia pert di ospedai. „I messun ćiarè da aumentè la spëisa sön le teritore y da smendrì de conseguënza i cosć di ospedai“, insciö Stocker che à ajunté da orëi ti dè na maiù importanza ai doturs de basa.
„Por smendrì l’aumënt di cosć te na manira asvelta gnarà les spëises standard internes de vigni repartiziun di ospedai metüdes a confrunt a livel provinzial por identifiché chëra che pîta le sorvisc ala spëisa plü bassa“, insciö l’assessuria provinziala. Sciöche secunda mosöra él preodü che al vëgnes istituì na direziun unitara y coletiva dl’Aziënda sanitara. Le diretur genereal ess insciö tl’organisaziun unitara nöia la funziun de aministradù general che indichëia i obietifs dles unites singoles y che ti lascia alsavëi i svilups ala Junta provinziala y al consëi de control. „Al mëss ester na spartiziun tlera dles competënzes danter provinzia y aziënda“, à sotligné Stocker. Sön la basa de chësta spartiziun gnaràl insciö definì l’organisaziun y les prozedöres. Na pert importanta dles diretives é so tëmp d’atuaziun. Le program à inom „Assistënza sanitara – Südtirol 2020“ y la realisaziun y la programaziun dles fases desfarëntes é dependëntes dala organisaziun temporala.
Le proscimo vare é n confrunt cun düć i partners dl sistem, cun les assoziaziuns di sindacać y di daturs de laûr, les assoziaziuns di amarà, y do les incuntades gnaràl laurè fora n plann sanitar provinzal y na lege provinziala sön l’orientamënt nü dla sanité che messarà gnì aprovada tl 2015. Cun le mëteman dl ann 2016 messaràl spo scomencè te na manira sistematica la realisaziun dles diretives nöies, di programs y dles deliberaziuns aprovades.
rc
