Atualità
Dala Junta: Les barieres architetoniches gnarà eliminades
La Junta provinziala à aprovè incö (30 de setëmber) n plann general de intervënć che prevëiga l’eliminaziun dles barieres architetoniches te düć i frabicać dla Provinzia por garantì l’anuzamënt dles strotöres a düć i zitadins. Al gnarà insciö eliminé ti proscimi agn i impedimënć architetonics ćiamò presënć por na spëisa totala de 15,75 miliuns de euro.
![](/news/img/lazy.gif)
Ti ultimi mëisc él gnü ejaminé indöt 253 imobiliars dla Provinzia por identifiché la presënza de impedimënć architetonics pro l’anuzamënt dles strotöres. Le resultat é che 160 strotöres provinziales à debojëgn de laûrs d’adatamënt y de recostruziun. „Chisc laûrs orunse insciö realisé vare por vare ti proscimi agn, por che nüsc frabicać pois gnì anuzà da düć i zitadins tla medema manira zënza desfarënzies: dales porsones cun handicaps, ala jënt atempada cun dificoltês motories o da geniturs che vëgn cun le baghele“, insciö le Presidënt dla Provinzia Arno Kompatscher.
Deache i laûrs d’adatamënt é desfarënć da strotöra a strotöra él l’Ofize Manutenziun frabicać che à laurè fora na planificaziun partida sö te trëi categories: la pröma reverda na seria de strotöres che ne à nia ćiamò atuè na gran pert dles normes por n azès zënza barieres architetoniches, la secunda reverda frabicać parzialmënter azessibli y la terza categoria contëgn frabicać che gnarà adatà tres de pices mudaziuns. „Di indöt 160 frabicać alda 56 pro la pröma categoria, 80 pro la secunda y 24 é gnüs inseris tla terza“, insciö Kompatscher.
L’Ofize Manutenziun frabicać à implü inće calcolè la soma dles spëises por l’adatamënt y la restrotoraziun di frabicać y che é de 15,75 miliuns de euro. „I ùn inćiariè le Departimënt Frabiché y Laûrs publics da inserì i intervënć tl program dles operes da realisé por podëi scomencè cun la planificaziun y atuaziun dles mosöres nezesciaries“, insciö Kompatscher.
rc