Atualità
Dala Junta: Prioritês, organisaziun y program dla Macroregiun alpina
Le Presidënt dla Junta, Arno Kompatscher, à referì incö (30 de setëmber) ala Junta provinziala i tëmps de realisaziun de na macroregiun alpina, de sü contignüs y süa organisaziun. La rajun dl inserimënt de chësc punt sön l’ordinn dl dé é stada l’incuntada, a chëra che Kompatscher à tut pert, danter les Regiuns interessades dla Talia inier a Milan.
48 regiuns, set stać, 45.000 chilometri cuadrać y indöt 70 miliuns de abitanć: chisc é i numeri prinzipai dla macroregiun alpina, che dess gnì realisada cun l’obietif da cöie adöm sot a un n tët i interesc coletifs dles regiuns alpines. „Cun chësta fondaziun orunsè s’assigurè plü sostëgn por les tematiches alpines, dandadöt a Bruxelles“, à splighé le Presidënt dla Provinzia Arno Kompatscher che à inće injuntè, che la fondamënta dla Macroregiun alpina é le renforzamënt di raiuns da munt. „Nosta priorité é dantadöt les lercs vitales di raiuns sensibli da munt y nia i zëntri urbans dan les Alpes“, insciö Kompatscher.
Por sotligné l’importanza de chësc orientamënt dla Macroregiun alpina s’à le Presidënt dla Provinzia Arno Kompatscher incuntè inier (29 de setëmber) a Milan cun i rapresentanć dles atres juntes dles Regiuns interessandes. „Inier unse debatü sön i contignüs prinzipai y l’organisaziun dla Macroregiun y stabilì i tëmps por le dagnì“, insciö Kompatscher che à definì sciöche tematiches zentrales le renforzamënt dla competitivité, l’evoluziun digitala, n turism eco-sostenibl, la proteziun dles ressurses naturales y cuntra i prighi dla natöra, la produziun sostenibla de energia renovabla, sciöche inće la mobilité y le trafich (dantadöt danter scines y strada).
Por ći che reverda l’aspet aministratif él gnü tut la dezijiun da ne cherié degöna aministraziun ajuntiva por la Macroregiun, mo da tratè les chestiuns che reverda döta la Macroregiun tres na colaboraziun transfrontaliera dles aministraziuns regionales. „Ći che an podess indere mëte sö é na figöra unitara de rapresentanza cun l’inćiaria da coordiné dötes les mosöres y por ti dè plü visibilité ala Macroregiun“, insciö Kompatscher.
Tratan l’incuntada él inće gnü sotligné l’importanza dla creaziun de n plann d’aziuns ćina le scomenciamënt de dezëmber 2014 por podëi le tratè daldô te na conferënza internazionala a Milan cun i presidënć de dötes les 48 Regiuns interessades y cun i ministri dl ester dla Talia, Francia, Svizera, Austria, Slovenia, Germania y Lichtenstein. La Comisciun dl’Uniun Europeica dess insciö avëi la poscibilité da mëte adöm na strategia por le Raiun dles Alpes por alplü tert de jügn 2015.
rc
