Atualità
Plü cualitè por les zones artejanales: La Junta à aprovè standarg nüs
Les zones artejanales ne dess nia ma plü ester na pert funzionala di raiuns, mo inće na cherta da vijita dles localitês: La Junta provinziala à aprovè porchël incö (30/09) standarg nüs por i raiuns produtifs. „Por concretisé chësc svilup orunse premié l'adoranza de concursc por la proietaziun, n anuzamënt de energia plü efiziënt y na maiù colaboraziun suraregionala", insciö Kompatscher.
Le numer dles zones artejanales tl Südtirol é söporjö de 1000. „La maiù pert de chëstes arees é diretamënter al’entrada di paîsc y é fej pert insciö dla pröma impresciun che an se fej dles localitês“, à dit incö (30/09) le Presidënt dla Junta Arno Kompatscher. Na pröma impresciun che ne é nia positiva te na gran pert di caji.
Por aumentè l'atrativité dles zones artejanales à la Junta provinziala aprovè incö (30 de setëmber) na seria de standarg cualitatifs da atué pro la proietaziun y la realisaziun de zones artejanales nöies. „Les mosöres atuades ćina śëgn vëgn insciö ampliades da na regolamentaziun nöia y unificada. Manco standarg, mo porchël plü tlers, messarà gnì tignì ite“, à dit Kompatscher. Le fin dla regolamentaziun nöia é n aumënt dla cualité bele tratan la fasa dla progetaziun: „Chësc ne ô porchël nia dì n aumënt di cosć por les dites, deache nosta priorité é chilò na premiaziun finanziara y nia n aumënt dles oblianzes da messëi tignì ite“, à sotligné le Presidënt dla Provinzia.
Insciö él preodü n aumënt di contribuć sön i cosć dl’urbanisaziun sce al vëgn scrit fora concursc d'idees por la realisaziun de zones artejanales (de oblianza por zones che superëia i 5000 metri cuadrać) o che s’anuzëia de soluziuns inovatives por ći che reverda na maiù efiziënza de energia. „Implü gnaràl aumentè i contribuć sce les zones artejanales gnarà scrites fora tres na colaboraziun suracomunala o sce al vëgn preodü plü zones vërdes co chës scrites dant“, insciö Kompatscher.
Por aumentè la presënza de zones vërdes ti raiuns artejanai à la Junta provinziala tut la dezijiun da ti dè na majera priorité ales arees publiches y nia a chëres privates. „Tles zones artejanales che superëia i dui hectars messaràl gnì inserì dala man publica tl dagnì n’area vërda de almanco cinch porcënt dla spersa y implü messaràl gnì sontè lëgns sön les trasses prinzipales dl trafich“, insciö Kompatscher che ajuntëia che „chisc é i standarg minimai, chi che prevëiga ćiamò plü vërt gnarà premié cun contribuć plü alć.“
rc
