Atualità
"De jënt nueva ons debujën": Sëira de referac ai 9 d’utober ala Teßmann
Tl cuntest dla lingia de referac "Per ejëmpl la Ladinia" vëniel ai 9 de utober pità doi referac tla biblioteca provinziela Teßmann a Bulsan: l prim referat de Pio Planatscher trata l’economia di bëns de cumenanza sciche l svilup sustenibl dl’economia per l daunì, l segondo de Stefania Demetz presentea la tematica dla garejedes dla copa dl mond de schi tl’otica dla problematica danter sport y show
Pio Planatscher tën n referat sun la tematica “La persona che ie me mbince”: La Perla, n hotel a Corvara tla Dolomites, menà aldò di prinzips dl’economia per l bën dla cumenanza y sustenì dala cunvinzion dl patron che nosta tiera ne supurterà nia plu scialdi giut de unì jarneda y sfruteda tres l dezipamënt y la monocultures ntensives. Mudazions economiches ie debujën, ma per les realisé ne ie la bona ulentà nia assé. L mudamënt di valores dla sozietà se damanda n lëur de cunvinzion a tëmp lonch. Y sce scumencion śën debota, śën, sarons boni de la fé ca.
Stefania Demetz rejona de “Sport event o sportainment?” L mond dla manifestazions sportives ie ruvà a n pont de ncrëusc. La cumpetizion, la garejeda, l juech ne ie ncuei nia plu assé. I spetadëures y i vijitadëures uel deplù. I se damanda aventures y emozions. Chi che urganisea al didancuei manifestazions sportives muessa perchël vester dantaldut “eventmanager” y cunlië nteresc economics cun la ncëria nueva de n “trasmetidëur de emozions”. Ajache – alincontra de duta la nutizies critiches sun i gran avenimënc sportifs che ne à nia da nfé truep cun l sport nstës – l sport resta for mo inant tl zënter. Perchël adrova n manager dl sport plu che mei na vijion etica.
La sëira de referac de Pio Planatscher y Stefania Demetz ie
n juebia, ai 9 d’utober 2014,
dala 20.00
tla Biblioteca Provinziela Dr. Friedrich Teßmann,
streda Armando Diaz 8,
Bulsan.
La lingia de referac jirà inant nchin de dezëmber 2014 y unirà stluta ju de jené 2015 cun la festa “Cin valedes, cin sënsc”.
USP
