Atualità
„ëres-FraueninfoDonne“: Analisa dla sanité sot l’otica dl’avalianza di sesc
La medejina de gëne analisëia les desfarënzies danter l’ëra y l’ël tl setur dla sanité: na tematica che vëgn inće tratada tla verjiun nöia de „ëres-FraueninfoDonne“, na revista che vëgn dada fora dala Consulta por l’avalianza dles oportunitês y che é desponibla da püch online.
„N sorvisc optimal d’assistënza sanitara ne po nia ma restè n privilegh di ëi. Na medejina che tëgn cunt tla medema manira de entrami i sesc é na sfidada che va debojëgn y porchël degun lus“, chësta é la traduziun dal todësch dles parores de salüt dl’assessuria por la sanité Martha Stocker.
Le risch dles ëres da morì do en bòt al cör é ćina aldedaincö cotan plü alt co chël di ëi. Öna dles gaujes de chësta desfarënzia é inće che les ëres ne manifestëia nia i sintoms che é gnüs aratà ćina aldedaincö siöche segnai d’alarm tipics. Chësta scoverta é n contribut important por l’evoluziun dla disciplina nöia dla medejina de gëne y vëgn inće tratada sciöche tema zentral dl’ediziun nöia „ëres-FraueninfoDonne“.
L’analisa dla medejina da n’otica dl’avalianza di sesc é le contribut prinzipal, implü pîta la revista da 32 plates inće plü tesć d’informaziun sön proieć finanzià y sostignis dala Consulta por l’avalianza dles oportunitês, al vëgn inće presentè l’aconsiadëssa nöia por l’avalianza dles oportunitês Michela Morandini, la garanta por l’infanzia y l’adolescënza Paula Maria Ladstätter y l’aconsiadëssa aministrativa y comerzianta Paulina Schwarz. Un di temesc tratà é inće la costruziun de n’imaja „tla televijiun y ti media“ dl’ëra tres i massmedia, informaziuns en cört y consëis da lì, sciöche inće n articul por ladin dal titul „Dependëntes da ideologies y ideai detei da dedora o crëier inò te nosta capazità intuitiva?“ scrit dala doturia Elisabeth Delago Salcher, omeopata tlassica y doturia di mituns.
La revista "ëres-FrauenInfoDonne" pon desćiariè jö debann sön la plata internet http://www.provinz.bz.it/chancengleichheit/themen/eres.asp.
Por na copia stampada prëibel damanè do tl Ofize Ëres tla strada Danter 11 a Balsan, telefonn: 0471 416950, E-Mail: frauenbuero@provinz.bz.it web: www.provinz.bz.it/chancengleichheit
rc
