Atualità
Kompatscher: segnai positifs por le tratatives cun le Govern
„Dal Govern unse ciafè segnai positifs sön n valgügn punć, sön d’atres chestiuns él ćiamò debojëgn da tratè, mo le tlima é positif“: Chësc le comentar dl Presidënt dla Provinzia Arno Kompatscher do l’incuntada da incö (pröm d’otober) a Roma danter le Minister dles Finanzes y Regiuns cun rapresentanć dles Provinzies de Trënt y Balsan.
Por gauja dl anulamënt dl jore a Roma n’à le Presidënt dla Provinzia Arno Kompatscher nia podü tó pert incö (1. de otober) al’incuntada danter le Govern y les Provinzies autonomes por portè inant les tratatives de revijiun di raporć finanziars y dla copartezipaziun dles Provinzies al ressanamënt dl bilanz publich, mo al à partezipè al’incuntada tres n colegamënt telefonich da Balsan. „I ùn podü registré n bun tlima de laûr, le Govern se é gnü adincuntra sön n valgönes ghiranzes che i ti ùn presentè dan da püch tëmp incà. Sön d’atres chestiuns messarunse ćiamò aprofondì le confrunt“, à comentè Kompatscher do l’incuntada de discusciun cun la ministra di afars regionai Maria Carmela Lanzetta, i secreters de stat Graziano Delrio y Gianclaudio Bressa y cun i rapresentanć dl Minister dl’Economia y dles Finanzes.
Implü él gnü stabilì che al gnarà laurè fora na proposta d’acordanza tecnica che gnarà tratada spo tla proscima incuntada politica. „Sön la basa dla proposta tecnica laurada fora podarunse spo tratè inant“, insciö Kompatscher. Le Govern à l’interès, tres do Kompatscher, da rovè a na contlujiun asvelta dles tratatives, inće deache al messarà tosc definì la lege de stabilité. Por le Presidënt Kompatscher él indere important da sotligné che al podarà ma gnì ciafè n consëns, „sce le resultat complessif dla tratativa se basarà sön na situaziun finanziara y iuridica sterscia, che garantësc la segurëza y la stabilité tl dagnì dl’autonomia.“
rc
