Atualità
I frabicać publics sarà defata zënza barieres architetoniches
En ocajiun dl Dé nazional por l’eliminaziun dles barieres architetoniches, che vëgn festejé chësc ann ai 5 de otober, à i assessurs provinziai Martha Stocker y Christian Tommasini invié incö (vëndres ai 3 de otober) a na vijita ala sënta dl Consëi provinzial por ilustré les dificoltês y les propostes de soluziun atuales y por sensibilisé sön l’eliminaziun dles barieres.
Le Dé Nazional por l’eliminaziun dles barieres architetoniches, che vëgn festejé vigni ann la pröma domënia de otober, é gnü istituì tl 2003 dal Presidënt di Ministri y toma chësc ann ai 5 de otober. Chësta recordanza anuala é gnüda metüda a jì por sotligné l’impëgn por l’eliminaziun de düć i impedimënć architetonics por alisiré l'azès ales strotöres publiches. En ocajiun dl’aniversar dla recordanza anuala à l’assessuria por la sanité y les politiches soziales Martha Stocker y l’assessur por i laûrs publics Christian Tommasini organisé na na vijita ala sënta dl Consëi provinzial por ilustré les dificoltês y propostes de soluziun atuales y por presentè les soluziuns por le dagnì. „Düć i zitadins dess insciö avëi les medemes poscibilitês zënza impedimënć da podëi rové pro y anuzè i sorvisc publics“ à sotligné l’assessuria Martha Stocker.
La Junta provinziala à aprovè da püch, ai 30 de setëmber, n plann general de intervënć che prevëiga l’eliminaziun dles barieres architetoniches te 160 frabicać dla Provinzia. L’assessur Tommasini à recordè che „i laûrs gnarà realisà dala Repartiziun Laûrs publics cun na dorada de presciapüch cinch agn y por n investimënt complessif de 15,75 miliuns de euro por garantì l’anuzamënt dles strotöres a düć i zitadins.“
Enzio Dellantonio, rapresentant dla Federaziun por le Sozial y la Sanité y Nikolaus Fischnaller dl Zënter por verc à presentè tratan la vijita da incö sües esperiënzes personales y à constatè, che nia ma ti frabicać provinziai mo inće te atres strotöres publiches él tres ćiamò da ciafè barieres architetoniches. N’atra chestiun portada dant da trami é la presënza de bojëgns gonot desvalis: por ejëmpl é i ćiantuns dl ur dl marćiapîsc n impedimënt por posones söl scagn da rodes mo n orientamënt dër ütl por n verc; te chësc caje foss magari n'arbassamënt di ćiantuns y dl ur dl marćiapîsc na buna soluziun por entrami i grups.
„Proietè, costruì por düć“: chësc é le titul de n convëgn internazional che gnarà tignì ai 29 de otober 2014 tla biblioteca dl’Université da Balsan dales 8.15 ales 13 che tratarà la proietaziun futura zënza impedimënć architetonics. Al é preodü intervënć de danter l’ater Leris Fantini, vizepresidënt dl’assoziaziun nazionala Centro Europeo Ricerca Promozione Accessibilità – C.E.R.P.A y Ulrike Rau, referënta por la realisaziun de frabicać zënza impedimënć architetonics da Berlin.
Consulënza tecnica por abité, laurè y vire zënza barieres architetoniches vëgn pitada da püch dal Ofize Porsones cun handicap, Palaz provinzial 12, strada Canonich Michael Gamper 1 Balsan. La consulënza vëgn pitada vigni vëndres domisdé dales 14 ales 17, al é nezesciar da prenotè n apuntamënt tres le secretariat dl Ofize (numer de telefon 0471 418270 o email persone.disabilita@provincia.bz.it). La Repartiziun Frabiché abitatif prevëiga inće la conzesciun de alirisaziuns sön le frabiché por pormënt a porsones cun n handicap cun n deficit funzional permanënt da adeguè l’abitaziun a sües esigënzes spezifiches. Tres l’Ofize tecnich vëgnel insciö aprovè contribuć a porsones, a families y inće a istituć y ćiases cun de plü afitadins. Inće l’Ofize tecnich é da ciafè tl Palaz provinzial 12, strada Canonich Michael Gamper 1.
Al é poscibl da ciafè plü informaziuns tres la plata internet: http://www.provincia.bz.it/politiche-sociali/temi/persone-handicap-invalidi-civili.asp
rc
Galaria dales fotografies
Foto: LPA/me
Foto: USP/me
