Atualità
Urbanistica: Baié para é poscibl ćina ai 15 de otober 2014
Do avëi stlüt jö les incuntades publiches él la discusciun sön la reforma dles normes provinziales sön l’orientamënt futur dl’urbanistica, dla sconanza dla contrada y dl svilup dl teritore dl Südtirol che va inant online ćina en mercui, ai 15 de otober. Vigni porsona interessada po dè jö ćina chësc terminn sües osservaziuns y propostes.
Le Departimënt Svilup dl teritore, Ambiënt y Energia à l’orentè da mët adöm na proposta de lege nöia por respogn ales sfidades futures dl svilup dl’urbanistica y dl teritore te Südtirol. Denant co mët man le prozès de elaboraziun dla proposta de lege dessel gnì chirì adöm les minunghes de düć i zitadins y dötes les organisaziuns che ô contribuì ala concretisaziun dla proposta. Por chësta rajun él gnü organisé dal assessur por l’ambiënt Richard Teiner cinch sëres d’informaziun y discusciun a Balsan, Porsenù, Bornech, Maran y Schlanders. L'aumënt dl utilisaziun dl terać, la manćianza de regolamentaziuns iuridiches, manco burocrazia y na scemplificaziun dla legislaziun sön l’urbanistica é stades valgönes tematiches che é gnüdes tratades tratan les sentades.
Por düć chi che à l'interès da se portè ite tla discusciun, chi po le fà ćina ai 15 de otober tres la compilaziun de n formular online sön la plata: http://www.provinz.bz.it/natur-raum/land-raum-mitdenken.asp. „Vigni tuta de posiziun gnarà ejaminada sceriamënter“, dij l’assessur Richard Theiner y fej n apel da anuzé chësta ocajiun por dè jö süa minunga sön tematiches tan importantes sciöche le svilup dl teritore, la sconanza dla contrada y l’orientamënt futur dl urbanistica.
Le Departimënt Svilup dl teritore, Ambiënt y Energia cöi insciö adöm dötes les osservaziuns. En basa ales propostes gnaràl spo laurè fora les diretives por la Junta provinziala che sarà spo les fondamëntes por l’elaboraziun de na lege provinziala nöia.
rc
