Atualità
Curidura d’asfalt dla streda Ciastel-Urtijëi:N à metù man cun l ressanamënt
Chisc dis vëniel ressanà la curidura d’asfalt dla streda da Ciastel a Urtijëi sëura Pas Pinëi. Ncuei, lunesc, àn metù man cun i lëures che reverda per ntant la trassa da Pas Pinëi a Ciastel.
Do avëi metù ju la cundota de fibra de scipa, che ti va do ala streda da Ciastel a Urtijëi, à l Servisc dla stredes dla Provinzia śën metù man de ressané la chëutra d’asfalt dla streda. Oradechël vëniel cuncià i danns dl corp dla streda sun na trassa de sies chilometri. Cun i lëures curespundënc, che vën dejëuc dala firma "Vendruscolo" de Tluses, iel unit metù man ncuei, lunesc.
L plan di lëures vëij danora che i vënie per ntant purtei inant nchin n juebia. Pervia dl majer trafich che se purterà pro pervia dla festa di "Kastelruther Spatzen" unirai lascei vester per la fin dl’ena y pona inò scumencei n lunesc che vën. Laurà uniral per ntant sun la trassa da Ciastel al Pas Pinëi y sce la cundizions meteorologiches resterà bones puderan nce bele mëter man cun i lëures sun la trassa Pas Pinëi-Urtijëi.
OSP
