Atualità
Agenda digitala 2020: Sura 500 indicaziuns por le dagnì digital dl Südtirol
Laurè adöm por portè inant le prozès de digitalisaziun ti ćiamps dl'aministraziun: por chësta gauja à la Repartiziun Informatica y la Südtiroler Informatik AG (SIAG) metü adöm la plataforma online SD2020 por cöie adöm les propostes plü desvalies ćina ai 09 de novëmber. Por le momënt él rové adalerch sura 500 indicaziuns.
Co dess pa le dagnì digital tl Südtirol ćiarè fora? Chësta domanda é al zënter dl proiet „Agenda digitala 2020“, a chël che düć i zitadins interessà y les organisaziuns interessades po tó pert y dè jö so arat y sües propostes. La plataforma é ponsada sciöche lerch digitala de confrunt y discusciun danter les organisaziuns dl ćiamp dl informatica adöm cun les südtirolejes y i südtiroleji.
L’assessuria por l’informatica Waltraud Deeg à presentè intratan les prömes zifres: „Ćina śëgn él gnü dè jö 536 usc tres la plataforma online y 50 idees.“ Chësc prozès de interaziun dess portè a na mioraziun di sorvisc publics por i zitadins y les aziëndes tres les tecnologies digitales d’informaziun y comunicaziun, insciö Deeg.
Tres la plataforma online www.sd2020.provinz.bz.it él poscibl da valuté, comentè y inserì ćina ai 9 de novëmber idees y propostes che svilupëia inant le prozès de digitalisaziun tl Südtirol. Implü él inće gnü organisé l’edema da denant na manifestaziun al EURAC da Balsan, olache rapresentanć de grups d’interès di ćiamps dl’economia, dla formaziun, dla sanité y dl’aministraziun s’à fat pinsiers sön n anuzamënt efetif y concret dles tecnologies digitales.
Düć i resultać, sides dla plataforma che dles incuntades, gnarà tuć en conscidraziun por la verjiun finala dl documënt strategich „Agenda digitala 2020“, che l’assessuria Deeg oress presentè ćiamò chësc ann ala Junta dla Provinzia.
rc
Galaria dales fotografies
