Atualità
Liber fondiar: L’êra di libri fondiars de papier é rovada
Da incö é düć i dać di Libri fondiars dl Südtirol desponibls tres na racoiüda digitala: l’êra di gragn volums fondiars de papier é gnüda portada a fin incö lönesc, ai 6 de otober te döt Südtirol cun na zerimonia de contlujiun ofiziala tl Ofize dl liber fondiar de Balsan. Dui i vantaji plü significatifs: la scemplificaziun dl relevamënt di dać y n'anuzamënt plü asvelt.
Les ultimes prozedöres de digitalisaziun é gnüdes stlütes jö da püch ti Ofizi dl liber fondiar de Balsan y de Kaltern y à insciö portè ala contlujiun dl inserimënt te na banca dać digitala de düć i dać di 10 Ofizi dl liber fondiar dla Provinzia. Le prozès de digitalisaziun à metü man ai 19 de jügn dl 2000 cun le Ofize dl liber fondiar de Schlanders, indöt él gnü registrè ti ultimi 14 agn düć i dać di 246 Comuns dl cataster. Indöt 654.754 parzeles y 1.483.405 iscriziuns tl liber fondiar de zirca 280.000 proprietars é insciö passades dala forma stampada ala forma digitala. „La digitalisaziun de düć i dać porta ala fin dl’êra di gragn volums de papier y pitarà la poscibilité de na chirida plü asvelta tres le computer zënza messëi saltè da un n ofize al’ater“, à dit incö (06.10) l’assessur Christian Tommasini. Tres le sistem d’informaziun por le liber fondiar y le cataster Openkat dles Provinzies de Trënt y Balsan él gnü ativé por i zitadins, corporaziuns privates o banches n azès diret ai dać, che po gnì ativé do n’acordanza y le paiamënt de na tarifa de anuzamënt. Por le momënt vëgn chësc sorvisc adorè da 11mile utilisadus y che tl 2013 à registré sura 1,5 miliuns contać tres le portal Openkat.
Por rengrazié düć chi che à contribuì ala realisaziun dl proiet él gnü organisé incö, lönesc ai 6 d’otober na zerimonia de contlujiun tl Ofize dl liber fondiar a Balsan, plaza Giorgio Ambrosoli 14. L’assessur Christian Tommasini à rengrazié i assessurs da denant, Hans Berger, Richard Theiner y Elmar Pichler Rolle che à albü en gestiun la digitalisaziun dl Liber fondiar y dl Cataster dal 2000 inant. Implü à Tommasini inće orü rengrazié la Regiun Trentin-Südtirol, les döes dites che à svilupé i programs, la Südtiroler Informatik AG (SIAG) y l’Informatica Trentina, sciöche inće düć i responsabls dl proiet y i colaboradus che à inserì y controlè düć i dać.
„La contlujiun de chësc prozès é öna dles inovaziuns plü granes metüdes a jì tl sistem dl Liber y Cataster fondiar y al é la fondamënta por n sorvisc ćiamò plü asvelt, efiziënt y daimprò ai bojëgns di zitadins“, insciö Tommasini che à ajuntè: „Impormò tres la digitalisaziun dl Liber fondiar y dl Cataster saràl poscibl da rielaborè les prozedöres y da integrè plü sorvisc por portè a mioramënć efetifs por ći che reverda inće l’azessibilité di sorvisc.“
Do la contlujiun dla digitalisaziun jararà śëgn inant cun na seria de proieć. Le Diretur dla Repratiziun Liber fondiar, Cataster fondiar y urban y l’assessur à ilustré valgügn di proieć por le dagnì, che sarà danter l’ater: la digitalisaziun dla racoiüda di documënć, la presentaziun telematica dles domandes por la registraziun tl liber fondiar (preodüda por le scomenćiamënt dl 2015), le mioramënt dla zircolaziun interna di dać danter le Ofize Liber fondiar y le vicare competënt, l’aministraziun di documënć, l’integraziun di programs de gestiun dl Liber fondiar y dl Cataster, l’adatamënt de Openkat (inće por smartphone y tablet) y n aumënt dla segurëza di dać.
rc
Galaria dales fotografies
Foto: USP/M.Diquirico
Foto: USP/A.Mair
Foto: USP/M.Diquirico
