Atualità
Dala Junta:Le bilanz de previjiun 2015 dess rové te Consëi por mez dezëmber
Le laûr de preparaziun por le bilanz de previjiun por le 2015 dla Provinzia de Balsan va inant. Les zifres é söporjö les medemes co chëres dl 2014. La Junta provinziala à aprovè incö (07/10) i terminns por l’aprovaziun dl bilanz: tratan la proscima edema él preodü n’incuntada cun les organisaziuns soziales, ai 28 de otober l’aprovaziun da pert dla Junta y dai 16 ai 18/12 la discusciun tl plenum.
La suma dl bilanz de previjiun dla Provinzia de Balsan sarà por le 2015 de 5,306 miliarg de euro, la pert che po gnì programada sciöche spëises é de 4,565 miliarg de euro, deache la desfarënzia mëss gnì sborlada da na pert por gauja de impostaziuns dal Stat. „La suma de chësc ann é n pü' plü alta co l’ann passè cun 4,521 miliarg“, à splighé incö Kompatscher tratan la conferënza stampa do la sentada edemala dla Junta provinziala. La Junta à definì incö, ai 7 de otober, i terminns che portará ala discusciun tl plenum dl Consëi provinzial y à stabilì na spartiziun primara dles spëises danter i assessorać. L’Ofize Finanzes arjignarà ca sön inćiaria dla Junta na tabela cun les ressures desponibles por vigni Repartiziun, tabela che chëstes messarà spo adorè sciöche basa por presentè na spartiziun interna dles spëises preodüdes por le 2015.
Öna dles modaziuns plü granes sarà indere le prozedimënt che portarà ala discusciun y aprovaziun dla proposta de bilanz 2015. „Por integrè tl prozès de costruziun dl bilanz inće i sindacać, les aziëndes y les assoziaziuns interessades él preodü por en mertesc, ai 14 de otober n’incuntada cun i rapresentanć dles organisaziuns soziales olache al gnarà presentè na pröma proposta de bilanz. Daldô arà vigni pert la poscibilité da fà propostes“, à detlarè incö Kompatscher.
Do l'incuntada cun les organisaziuns soziales sarà la Junta provinziala che messarà aprovè la lege de bilanz y la lege finanziara. La sentada d’aprovaziun é preodüda por ai 28 de otober. „Do l’arat positif dla Junta gnarà le bilanz mené inant al Consëi di Comuns y daldô ala Comisciun legislativa dl Consëi provinzial“, insciö Kompatscher. Te Consëi provinzial dess le bilanz de previjiun 2015 rové ai 12 de dezëmber cun votaziun definitiva sön le bilanz y la lege finanziara preodüda dai 16 ai 18 de dezëmber 2014 tl plenum dl Consëi provinzial.
rc
