Atualità
Dala Junta: CCI sön i frabicać rurai, demanco burocrazia
Tl Südtirol él indöt 20.000 frabicać rurai, la maiù pert de chisc é tablà, majuns y üties da munt, che messass gnì registrà tl cataster di frabicać y relevà por la calcolaziun dla Cuta comunala sön i imobiliars (GIS, IMI). Chësta relevaziun burocratica é gnüda eliminada incö, ai 7 de otober dala Junta provinziala.
La Junta provinziala à stabilì incö, mertesc ai 7 de otober, na regolamentaziun unitara por ći che reverda la relevaziun de frabicać rurai che vëgn anuzà por ativitês agricoles. „Ćina śëgn ne ê la regolamentaziun nia tlera por ći che reverda i frabicać rurai, dandadöt por i tablà y les üties da munt, che é scrites ite tl cataster fondiar mo nia tl cataster di frabicać“, à splighé incö l’assessur por l’agricoltöra Arnold Schuler.
Cun l’aprovaziun dla Junta provinziala él preodü che al toma demez le paiamënt dla Cuta comunala sön i imobiliars (CCI) por düć i frabicać rurai che vëgn anuzà da plü agn por n’ativité agricola y che ne é nia gnüs ressanà o arlunjà te chisc agn, inće sce ai ne é nia scrić ite tl cataster por frabicać. „Bele ma la relevaziun y l’inserimënt de düć i frabicać ess albü n cost por l’agricoltöra de almanco 50 miliuns de euro“ insciö Schuler.
La deliberaziun aprovada dala Junta incö reverda ma frabicać rurai che vëgn anuzà por ativitês tl ćiamp dl agricoltöra, „por les ćiases de abituaziun rurala y por ći che reverda les formes de aziëndes da paur „Urlaub am Bauernhof“ ne é les normes nia gnüdes mudades. „Chël ô di che por les vacanzes tles aziëndes da paur gnaral calcolè la medema alicuota dla CCI co che por l’afit de ćiamenes privates“, à splighé Schuler.
„Cu chësta dezijiun vëgnel insciö garantì n’avalianza fiscala y soziala, y implü unse podü atuè inće öna dles competënzes nöies che ti é gnüdes surandades ala Provinzia te chësc ćiamp por alisiré le pëis burocratich por les aziëndes da paur“, à comentè l’assessur Schuler.
rc
