Atualità
Dala Junta: La situaziun sön les tratatives finanziares cun le Govern
L'acordanza finanziara danter Balsan y Roma dess gnì metüda sön na basa iuridica sterscia, internazionala y de dorada lungia che prevëighes garanzies de planificaziun y n contribut de finanziamënt mënder co chël atual: Le Presidënt dla Provinzia à presentè incö (ai 7 de otober) ala Junta provinziala les diretives por les tratatives finanziares cun Roma.
Le Presidënt dla Provinzia Arno Kompatscher à referì incö, mertesc ai 7 de dezëmber ala Junta provinziala la situaziun atuala por ći che reverda les tratatives cun le Govern sön la redefiniziun dla situaziun finanziara che dess portè a n'acordanza finanziara danter Roma y Balsan. Sön la basa dl'acordanza de Milan él preodü che le Stat se tignes derevers le 10 porcënt dles entrades fiscales dl Südtirol y che la Provinzia de Balsan ajuntëies implü vigni ann 100 miliuns de euro por ressanè i debić dl Stat. „Fora de chëstes somes se tignarà le Stat chësc ann 700 miliuns de euro, inće sce al ne é nia preodü dal’acordanza de Milan. Cuntra chëstes violaziuns al’acordanza unse bele fat recurs ala Curt costituzionala“, à splighé Kompatscher che à ajuntè, che al é inće gnü anunzié che le Stat prevëiga ćiamò valgönes mosöres por ressanè le bilanz tres la partezipaziun dles Regiuns y insciö inće dl Südtirol.
Les tratatives danter la Provinzia de Balsan y le Stat dess insciö portè a n cheder normatif cun plü stabilité iuridica y de planificaziun por i proscimi agn. Öna dles condiziuns por na contlujiun positiva dles tratatives é por le Presidënt Kompatscher inće l’integraziun tl’acordanza dl’Austria, sciöche garant internazional: „L’inserimënt dl’Austria é na conditio sine qua non.“ Por Kompatscher dess l’acordanza finanziara stabilì danü les relaziuns finanziares danter le Stat y la Provinzia por i proscimi diesc agn: „I orun definì na soma fissa da paié vigni ann al Stat por i proscimi diesc agn y porchël orunse la garanzia da nia ne mëssei plü contribuì tl dagnì a mosöres finanziares statales nia programades sciöche al suzed śëgn“, à dit Kompatscher che à stlarì, che l’acordanza dess gnì stabilida sön na soma de contribut mëndra co chëra atuala de 800 miliuns.
Les propostes dla Provinzia y dl Stat vëgn por le momënt laurades fora da na comisciun tecnica. „Chësta presentarà inće na pröma proposta concreta d’acordanza che sarà spo la basa por na discusciun cun i rapresentanć dles istiuziuns politiches. L’acordanza gnarà impormò firmada do che ara sarà gnüda presentada al Consëi provinzial“, à stlüt jö le Presidënt dla Provinzia
rc
