Atualità
Fiera dla formaziun „Futurum“: Apresciapüch 19.000 vijitadus te trëi dis
Cun apresciapüch 19 mile vijitadus s'à la Fiera dla formaziun "Futurum" y le campionat provinzial “Mistiers tla competiziun 2014” stlüt jö ai 4 de otober a Balsan. I vijitadus é aumentà de 3.600 unitês en confrunt al’ediziun dl 2012.
L’assessur por la scora y cultura todëscia Philipp Achammer sotlignëia insciö süa contentëza por le suzès dla cuinta ediziun dla „Futurum“, che é gnüda organisada tla sënta dla Fiera a Balsan dai 2 ai 4 de otober y che à registré la partezipaziun de söporjö 19.000 vijitadus.
La Fiera Futurum à pité na suraodüda sön i percursc formatifs y profescionai dales scores altes y profescionales inant ćina ala formaziun universitara y permanënta sön le laûr. Le moto dla fiera dl 2014 é stè „formaziun y ocupaziun“. Te plü seminars, concursc y discusciuns é l’interaziun danter la formaziun profescionala y le monn dl laûr stada al zënter dles debatüdes.
Tl cheder dla fiera dla formaziun él inće gnü metü a jì le campionat provinzial “Mistiers tla competiziun 2014” te indöt 26 profesciuns tl setur dl artejanat, tl’agricoltöra, tl turism y tla gastronomia. „L’integraziun dl monn dl laûr y di aspeć desvalis dla formaziun, sciöche n'organisaziun unitara danter les ofertes formatives por i scolars y di Campionać provinziai di mistiers à dessigü contribuì al suzès dla manifestaziun“, à comenté l’assessur Achammer.
Tratan la Fiera él inće gnü presentè da plü daimprò, tres la scomenciadia MINT, les materies tecniches y scientifiches sciöche la matematica, l’informatica, les sciënzes naturales y la tecnica.
La 5. fiera dla formaziun é gnüda organisada dala Repartiziun Promoziun dl stüde, Université y Inrescida en colauraziun cun i 3 departimënć por la formaziun y l’istruziun (todësch, talian y ladin), la Repartiziun Formaziun profescionala por l’agricoltöra, i bosć y l’economia de ciasa, cun i ofizi por l’ajornamënt dles repartiziuns dla cultura todëscia y taliana, y inće cun l’assoziaziun di artejans y cun la fiera da Balsan.
rc
