Atualità
Aministraziun inovativa 2018, incuntada ai 15 d’otober
Aprofondì le conzet de na buna aministraziun, garantì prozesc efiziënć y n’adoranza prezisa dles ressurses y ofrì sorvisc de cualité: chisc é i obietifs dl proiet „Aministraziun inovativa 2018“, che sarà al zënter de na Conferënza danter le Presidënt Kompatscher, l’assessuria Deeg y le Diretur general Staffler ai 15 d’otober a Balsan.
Un di obietifs primars da ademplì é por la Junta provinziala l’inovaziun dl funzionamënt dl’aministraziun publica inće tl’otica dles sfidades nöies che le svilup dla sozieté porta cun se. Plü responsabilité ai zitadins y na trasparënza plü ampla pro i sorvisc pità é döes dles soluziuns poscibles sön chëres che al vëgn laurè. Por miorè l’efiziënza dles prozedöres aministatives y por adorè les ressurses te na manira plü prezisa él gnü elaborè le conzet „Aministraziun inovativa 2018“. Le proiet gnarà ofizialmënter scomencè cun na conferënza de presentaziun dl proiet, tratan chëra che le Presidënt dla Provinzia Arno Kompatscher, l’assessuria competënta Waltraud Deeg y le Diretur general Hanspeter Staffler portarà dant la strotöra dl proiet y i proscimi vari dl percurs dl’inovaziun aministrativa ćina 2018. La sentada gnarà tignida
en mercui ai 15 d’otober 2014
dales 14.30
tl Auditorim dl’EURAC
strada Druso 1
a Balsan.
Informaziuns por les redaziuns: fotografies y registraziuns é poscibles tratan le scomenćiamënt dla sentada dales 14.30. Do l’incuntada, incër les 16, saràl poscibl da intervisté Kompatscher, Deeg y Staffler .
rc
