Atualità
11 d’otober – Dé internazional dles mitans
En sabeda, ai 11 d’otober 2014, vëgnel organisé por le terzo iade le Dé internazional dles mitans. La scomenciadia é gnüda metüda a jì dales Naziuns Unides tl 2011, l’assessuria competënta Martha Stocker y la Presidënta dla Consulta por l’avalianza dles oportunitês Ulrike Oberhammer anüza chësta ocajiun por recordè l’importanza da sostignì les mitans te so svilup por plü independënza y autostima.
Les ghiranzes do na promoziun dl’educaziun de mitans y de ëres jones, la scombatüda cuntra i matrimoni sforzà, l’avalianza dles oportunitês danter l’ëra y l’ël te düć i ćiamps dla vita, l’atuaziun dles leges cuntra la descriminaziun y la condana dla violënza sön les mitans y ëres jones é por les Naziuns Unides sfidades fondamentales por aumentè l'independënza y favorisé l'avalianza de tratamënt y dles oportunitês dles mitans. Por sotligné l’impëgn da ademplì ales ghiranzes él les Naziuns Unides che mët a jì le Dé internazional dles mitans, vigni ann ai 11 d’otober.
Un di caji che à albü plü ressonanza sön l’opiniun publica mondiala ti ultimi agn é stada la storia dla jona pachistana de 15 agn Malala Yousafzai, che é gnüda stlopedada al će y ferida dassënn ai 9 d'otober dl 2012 tratan n’atentat de n’organisaziun teroristica dl Pachistan ala coriera che la portâ a scora. Por so impëgn por i dërć dles mitans da avëi n azès garantì al’educaziun scolastica y por so coraje da alzè la usc cuntra les impostaziuns di talibans é Malala gnüda nominada por le Pest Nobel dla Pêsc y le Parlamënt europeich ti à surandè le Pest Sacharow por dërć umanns.
Tres n raport dles Naziuns Unides ne à 132 miliuns de mituns y mitans degun azès a n’educaziun scolastica. „Al é important da miorè les condiziuns de vita dles mitans, da sotignì n svilup che portes a na maiù cosciënza de sè instësses y da les avijiné ales profesciuns tecniches che é inće na forma stabila de davagn y de independënza“, à comentè l’assessuria por l’avalianza Martha Stocker.
La Consulta por l’avalianza dles oportunitês se engajëia bele da agn cuntra la violënza sön les ëres y mitans y à iniziè plü proieć, sciöche por ejëmpl na brosciüra cun informaziuns y consëis de segurëza „Sicherheitstipps für Gitschn“/“Forza ragazze! Consigli per la sicurezza“. La Presidënta dla Consulta por l’avalianza dles oportunitês, Ulrike Oberhammer, à sotligné l’importanza dl laûr de prevenziun: „Al é important che les mitans sides a conescënza dles poscibilitês de reaziun te situaziuns de pericul. Inće por ći che reverda l’imprudënza sön internet él da mët averda: informaziuns privates sciöche numeri de telefonn y fotografies vëgn ćiariades sön facebook o atres plates zënza conësce deplëgn les conseguënzes che chësc po avëi. Al é da dè a mënt ći informaziuns che an mët a desposiziun, deache ares po gnì maladorades.“
La brosciüra „Sicherheitstipps für Gitschn“/“Forza ragazze! Consigli per la sicurezza“ é da ciafè tl Ofize Ëres (strada Dante 11, 39100 Balsan, tel. 0471 416950) o po inće gnì desćiariada o lita online tres la miscun: www.provinz.bz.it/chancengleichheit
rc
Galaria dales fotografies
